Suka K: Europap soqutigisai soqutigisatsinnut naapertuuttuaannanngillat
Namminiilivinnissamut, nunanut allanut tunngasunut nunalerinermullu naalakkersuisoq Suka K. Fredriksen sisamanngornermi Finlandimi ataatsimiinnermi taama oqarpoq.
Ataatsimiinnermi Issittoq EU-millu suleqateqarneq eqqartorneqarput.
AAMMA ATUARUK EU 235 millioninik nunatta karsianut nakkartitsisoq
Tassani Suka K. Fredriksenip serseqqissaatigaa nunaqavissut akuutissinnaagunigit EU Issittumi suleqataasinnaasoq.
- Issittumi aningaasarsiornikkut ineriartortitsinerup saniatigut pingaaruteqarpoq avatangiisit silallu pissusaata allanngoriartornera pillugu ilisimasaqarnerup annertusartariaqarnera. EU-p allallu suleqatiginerunissaat tikilluaqquagut naalakkersuisoq oqarpoq.
Europa kommissioni Nunanilu allani sullissivik marluullutik EU-p Issittumi iliuusissai pillugit siorna saqqummiussipput.