PISUT: Europami saassussinerit kingulliit
Amerikamiup erinarsortartup Ariana Grandep Manchesterimi ataasinngormat unnukkut tusarnaartitsineranut atatillugu qaartartumeerisoqarmat inuit 22-t toqutaapput.
Angut ataaseq imminut pilliutigitigaluni qaartartumeerisimasoq tuluit politiivinit uppernarsarneqartoq tusagassiorfiit arlallit allaaserisaat.
Europami nunani arlalinni ukiuni kingullerni saassussisoqartarpoq.
Aajukulu ilaat:
2017:
* Tallimanngornermi apriilip arfineq-aappaani. Sverigemi illoqarfiup Stockholmip qiterpasissuani Drottninggatanimi pisiniarfissuup Åhlénsip eqqaani inuppassuit lastbiilimik aporneqarput. Inuit sisamat toqutaapput.
Angut Usbekistanimiu 39-nik ukiulik lastbiilimik ingerlatsisimasutut pasineqarluni tigusarineqarpoq.
* Marsip 22-ani: Tuluit inatsisartoqarfiata Westministerip Londonimiittup eqqaani inuppassuit biilimik aporneqarput. Angut Tuluit Nunaanni inunngortoq 52-inik ukiulik biilimik ingerlatsisuuvoq.
Saassussinermi tassani inuit 50-init amerlanerusut aqqunartiterput tallimallu toqullutik. Toqutaasut ilagaat saassussisoq. Taanna inatsisartoqarfimmut iserteriaraluarnermini politiinit aallaaneqarpoq.
* Februaarip pingajuani: Sakkutuup frankrigimiup Parisimi katersugaasiviup Louvrep eqqaani angummit saassunneqarluni angut aallaavaa. Saassussisoq savissuarmik sakkoqartoq aallaaneqarpoq ikiligaangaatsiarlunilu.
Sakkutooq frankrigimiu Louvrep saniani pisiniarfissuup Carrouselip eqqaani nakkutilliitilluni saassunneqariataarpoq.
2016:
* Decembarip 19-iani: Berlinip qiterpasissuani juullimi niuffattut lastbiilimik saassunneqarmata inuit ikinnerpaamik aqqaneq-marluk toqutaapput 48-llu aqqunartiterlutik. Saassussineq oqartussanit islamisiortut peqqarniisaarniarnerattut nalilerneqarpoq.
* Juulip 26-ani: Frankrigimi illoqarfimmi Saint-Etienne-du-Rouvrayimi inuit tallimat angutinit marlunnit pinngitsaaliiniutitut tigusarineqarput. Tigusarineqartut ilaat ataaseq toqutaavoq allalu inuunerminik navianartorsiortitsilluni. Pinngitsaaliiniutitut tigusarinnittut politiinit aallaaneqarlutik toqutaapput.
Nutaarsiassaqartitsivik Amaq naapertorlugu IS saassussinermut akisussaasuunerarpoq.
* Juulip 24-ani: Syriami imminut pilliutigitigaluni qaartartumeeriniaq Tysklandimi Ansbachimi nipilersornikkut pikialaartitsisoqarnerani qaartartumeerivoq. Inuit 15-it ikiligaapput. Qaartartumeerisoq Islamisk Statimik tapersersuisuuvoq.
* Juulip 18-ani: Inuusuttuaraq, tassaasorineqartoq Afghanistaniumi nunasiniartoq 17-inik ukiulik, Bayernimi qimuttuitsuni saassussivoq inuillu tallimat ikiligaapput. Saassussisup Islamisk Statimik tapersersuisuunissaa ilimagineqarpoq.
* Juulip 14-iani: Angutip 31-nik ukiullip Frankrigimi illoqarfimmi Nicemi Bastillep nalliuttorsiutigineqarneranut atatillugu qummoroortartunik takutitsinermut isiginnaariat lastbiilimik aporpai, inuillu 84-it toqutaapput. IS-ip angut saassussisoq sakkutoorinerarpaa.
* Juunip 13-iani: Parisip eqqaani Magnanvillemi politiit pisortaat nulialu angummit toqutaapput. IS saassussinermut akisussaasuunerarpoq. Saassussisoq politiinit toqutaavoq.
* Marsip 22-ani: Bruxellesimi peqqarniisaarniartoqarnerani inuit 32-t toqutaapput. Timmisartoqarfissuaq Zaventem nunallu iluatigut qimuttuitsoqarfik Maelbeek saassunneqarput. Inuit 340-t missaat ikiligaapput. Saassussisut islamisiortut pingasut saassussinermi aamma toqupput.
2015:
* Novembarip 13-iani 14-ianilu: Parisimi tusarnaartitsisarfimmi Le Bataclanimi, Stade de Francemit illoqarfiullu qiterpasissuani ataqatigiissaakkamik saassussisoqarpoq. Inuit 130-t toqutaapput Frankrigillu oqaluttuarisaanerani peqqarniisaarniat saassussinerisa ingasannerpaartarivaat. Islamisk Stat saassussinermut akisussaasuunerarpoq.
Najoqqutarisat: Ritzau, AFP, CNN, Frankfurter Allgemeine Zeitung.
/ritzau/