EU-p puisit amiinik eqqussuinermut aalajangersagaa sukateriffigineqassanngilaq
EU-p iluani Niuerfimmut Atuisartullu illersugaanerannut Ataatsimiititaliaq (IMCO) ullumi aalajangerpoq puisit amii pillugit aalajangersagaq sukateriffigineqassanngitsoq.
Naggueqatigiit Inuit piniartortaat taamaasillutik angusamik amiinik EU-mi nunanut tuniniaanertik ingerlatiinnarsinnaavaat.
AAMMA ATUARUK ICC Bruxellesimi tapersersorneqarluartoq
Namminersorlutik Oqartussat danskit naalakkersuisui Bruxellesimullu aallartitat peqatigalugit, EU-p puisit amiinik eqqussuinermut malittarisassanik sukaterinissamik pilersaarutiminik taamaatitsiinnarnissaa qaammatini kingullerni ilungersorlutik sulissutigaat. Sukaterisoqarneratigummi Kalaallit Nunaata puisit amiinik EU-mi nunanut tunisaqarsinnaanera ajornakusoortupilussuanngussagaluarmat.
Tamannalu nunatta karsiata aningaasaqarneranut piniartullu isertitaannut annertuumik sunniuteqassagaluarpoq.
AAMMA ATUARUK EU-mi isumaqatigiinniarnerit Great Greenlandimut pingaaruteqartut
Allaaserisaq EU-p iluani Niuerfimmut Atuisartullu illersugaanerannut Ataatsimiititaliaanit ullumi suliarineqartoq, naggueqatigiit Inuit puisinniartarnerannik ingerlaavartumik nalilersuisarnissamik ilaneqarpoq, taamaalillunilu EU-mut puisit amiinik eqqussuinerup sukateriffiginiarneqarnera pinngitsoortinneqarluni. Aammattaaq naggueqatigiit Inuit puisinniartarnerat pillugu EU-p Europami paasititsiniaanissaanik ilaneqarpoq.
Suliap Europaparlamentimi septembarip qaammataani taasissutigineqannginnerani, allaaserisaq Ministerit siunnersuisooqatigiivinut ingerlateqqinneqassaaq.