EU-p nalunaarusiaa: Silapiluttarnerujussua ilaasortatsinnut 100 milliardit koruunit missaannik siorna naleqarpoq
Europami sila, nunarsuup sinneranut naleqqiullugu marloriaammik kiatsikkiartorneruvoq. Kiattarnerujussuit, malunnaatilimmik kiatsikkiartornerit, silapiluttarnerujussua, qarsutsinersuit, panernersuaqarneq, orpippassuillu ikuallattut.
Tassa EU-p silap pissusianik nakkutilliiviata Copernicusip ukiumoortumik nalunaarusiornermini "European State of the Climate"-imi immikkut maluginiagassatut tikkuagai.
Qarsutsinersuit inunnut 1,6 millioninut sunniuteqarsimasut nalunaarummi oqaatigineqarpoq, inuillu 550.000-t anorersuartarneranit, inuillu 36.000-t orpippassuit ikuallattarnerinit eqqorneqarsimallutik.
Inuit 151-it silapiluttarnerani siorna ajunaarsimapput.
Immat kissatsikkiartornerat aamma sunniutipiloqarpoq, pingaartumik maajip qaammataanit oktobarip tungaanut, immami avatangiisit allannguuteqarlutik, uumasoqassuserlu eqqorneqarluni.
Kiarujussuartarnera silapiluttarneralu akisusimaqaat. Tassami silap pissusiata sunniutipilui 13,4 milliardit Euronik, imaluunniit 100 milliardit koruunit missaannik naleqarsimapput.
Nunarsuatta Issittortai eqqorneqarnerpaapput. Tamaanimi ukiuni qulikkuutaani pingasuni kingullerni nunarsuup sinneranut naleqqiullugu pingasoriaammik kiatsinnerusimavoq.
Sermersuit immallu sikui aakkiartupiloorsimapput, soorlu aamma nuna qeriuaannartoq aakkiartuinnartoq, pinngortitamilu ataqatigiinneq eqqorneqarlutik.
Immap sikuata aakkiartuinnarnera immat sarfaannut kinguneqarsinnaavoq, immammi sikuata aakkiartuinnarnerata kingunerisaanik immat qaffakkaluttuinnarmata.