EU issittumi ilisimatuussutsikkut misissuinernik nukittorsaaniartoq

Suliniutigineqartoq 2 million Euronik aningaasaliiffigineqartoq 2020-p tungaanut ingerlanneqartussami, Europami ilisimatusarfeqarfiit 22-t, nunarsuaq tamakkerlugu ataqqisaasut, suleqatigiissinneqassapput.

Taamaaliornermi siunertarineqarpoq europamiut issittuni ilisimatusariaasiisa 2020-p tungaanut siuarsarneqarnissaat ataqatigiissarneqarnissaallu.

Ilisimatusaatigalugu suliniutinit Europami inuiaqatigiit taakkulu aningaasaqarnerinut siuarsaataasumik kinguneqarnissaat anguniarneqarpoq.  Kiisalu EU-Polarnettikkut politikerit, inuussutissarsiorfiit suliffissuaqarnermilu aqutsisut, sumiiffinni inuiaqatigiit ilisimatusartartullu oqaloqatigiiffigisinnaasaannik pilersitsisoqarpoq, taamaalilluni europamiut Qalasersuarmi Avannarlermi Kujallermilu ataqatigiissumik ilisimatusarnernik suliaqartalerniassammata.

Suleqatigissallugit pilerinartut

Pinngortitaleriffik ilisimatusarfeqarfinnut peqataasussanut EU-PolarNet-imut 22-nut ilaavoq.

- Nutaamik ataqatigiissumik suliniuteqartoqarnera Europa-Kommissionip nuannaarutigaa, tassami ilisimatuussutsikkut nunarsuup Qalasersuaqarfiinut tunngassutilitsigut ilisimatusarnerit soqutigisallu allat ataatsimoortinneqarmata, Pinngortitaleriffiup pisortaa Klaus Nygaard oqarpoq.

- Pinngortitaleriffiup nukittoqutaasa ilagaat pitsaalluinnartunik, Issittuni tamarmi ukioq kaajallallugu misissuinissamut atorsinnaasunik atortuuteqarnini. Pinngortitaleriffik aamma atuagarsornikkut teknikikkullu ilinniarluarsimasunik sulisoqarpoq, immikkut ilisimasaqarnertik pisinnaassuseqarnertillu atorlugit suleqataanissamut ajukkunnanngilluinnartunik, Pinngortitaleriffiup pisortaa taama naqissusiivoq.