Naalakkersuisut Qasigiannguani Aasiaannilu erngup nukinganik nukissiorfimmik pilersitserusuttut
Nukissiuutit 2030-imi sapinngisamik piujuaannartitsinermik aallaaveqartuunissaat, Naalakkersuisut anguniagaraat. Nukissiuuteqarnermullu naalakkersuisoq Jess Svane naapertorlugu, tamanna anguneqariartorpoq.
Qasigiannguanut Aasiaannullu pilersuisussamik erngup nukinganik nukissiorfiliornissaq, Nuummilu erngup nukinganik nukissiorfiup allilernissaa Naalakkersuisut sulissutigaat.
AAMMA ATUARUK Ukiuni 25-ni erngup nukissiuteqarneq nalliuttorsiutigigaat
Qasigiannguit eqqaanni tatsit Kuussuup Tasia Qinngap Ilulialeeraalu nukissiorfimmut imeqarfittut atorneqassasut Nukissiorfiit erngup nukinganik nukissiorfiit pillugit nalunaarusiaanni allaqqavoq. Tassanilu erngup nukinganik nukissiorfeqalissappat, nukiup Qasigiannguani Aasiannilu atorneqartup 95 procentia piujuaannartitsisumik aallaaveqassaaq, Nuummilu nukissiorfik allilerneqarpat nukissiorneq piujuaannartitsinermik aallaaveqartoq 99 procentiussalluni.
Aningaasanik orsussamillu sipaarutaasussat
Erngup nukinganik nukissiorfiit taakkua atuutilissappata, orsussaq sipaarutaasussaq ukiut 22-t ingerlaneranni 545 millionit literiussaaq. Taavalu nukissiorfinnit taakkunannga nukimmik pilersuineq maanna pilersuinermut sanilliullugu ukiuni 22-ni 248 millionit koruuninik iluanaaruteqarfiussaaq.
Nuummili nukissiorfik sinneqartooruteqarluni ingerlassaaq, taannami ukiut 22-t ingerlaneranni 465 millionit koruuninik iluanaarutaassangatinneqartoq, Qasigiannguit eqqaanni nukissiorfik ukiut 22-t ingerlaneranni 217 millionit koruuninik annaasaqarfiussangatinneqarpoq.
3 milliardit koruuninik akeqassapput
Nukissiorfiliornissamulli alliliinissamullu katillugit 3 milliardit koruuninik siullermik aningaasassarsiortoqaqqaassaaq.
Naalakkersuisut aningaasalersuinissamut periarfissanik arfinilinnik Inatsisartunut saqqummiipput, taakkulu sanaartornermut ataatsimiititaliamit maanna misissorneqarput.
AAMMA ATUARUK Erngup nukinga nunatsinnut aningaasaliisussanut ussassaarutaassasoq
Inatsisartut toqqagaat Naalakkersuisut nukissiorfiliornissamut alliliinissamullu siunnersuusiornerminni tunngavigissavaat.
Siunnersuut taanna kingusinnerpaamik aappaagu ukiakkut ataatsimiinnissami saqqummiunneqassaaq.
