Erling Høegh Katuami nalliuttorsiutigineqassaaq
Landsrådimi ilaasortat nammineerlutik kina siulittaasunngussanersoq ukiut 50-it matuma siorna siullermeerlutik namminneq aalajangerpaat. Taanna sioqqullugu danskit naalagaaffianni atorfillit qullersaat siulittaasuusarput.
Erling Høegh pingaaruteqarluinnartuusimasoq, Lars-Emil Johansen isumaqarpoq.
- Nunatta politikkikkut oqaluttuarisaanerani pingaartorujussuuvoq. Nammineerusussutsimik takutitsineq, alloriarneq siulleq, Lars-Emil Johansen KNR-imut oqarpoq, nangillunilu;
- Taanna aallarniutigalugu Nunatsinni naalakkersuinikkut eqeeriartorneq pinikuuvoq. Erling Høghip siulittaasunngornermi kingorna 1970-imi Sisimiuni ataatsimeersuartitsivoq. Ataatsimeersuarneq, isumaga malillugu, 70-ikkunni pisunut aallarniutaasutut ippoq, naak Danmarkimut atanissaq pillugu annertuumik politikkikkut isumaqatigiinngiffiugaluarluni, Inatsisartuni siulittaasoq Lars-Emil Johansen oqarpoq.
Ullumi ulloq malunnartillugu Katuami inersuaaqqami nalunaaqutaq marluniit sisamat qeqqata tungaanut kaffillertoqassaaq.
