Erinarsortartoq tusaamasaq ikiaroornartuuteqarluni paasisaasoq

Amerikamiu countrymik erinarsortartoq ilisimaneqarluartoq Kris Kristofferson, ikiaroornartumik marihuanamik Savalimmiunut anngiortumik eqqussisimasutut, Torhavnimi eqqartuussivimmi eqqartuunneqarpoq.
Assi © : Begemot/Flickr Commons
Allattoq Jonas Fievé
aggustip 14-at 2017 19:28

Taanna Vagarip mittarfiani sulisunit siorna septembarimi paasineqarpoq. Meeqqat Torshavnimi angerlarsimaffiannut aningaasanik katersisoqarnissaanut atatillugu arlaleriarluni tusarnaartitsisussaagaluarpoq.

Qimmeq ikiaroornartumik eqqussiniartoqarneranik paasiniaasartunit atorneqartartoq Kristoffersonip eqqussiniarsimaneranik paasinnissimasoq, Torshavnimi unnerluussisussaatitaasup eqqartuussinermi nassuiaatigaa.
Akitsuuserisut Kris Kristoffersonip nassatai misissorpaat, marihuana 3 grammi, jointillu 23-t nassaarineqarlutik. Ikiaroornartut pineqartut ulluni sisamani Savalimmiuniinnermini atugassatut nammineq nassuiaatigisimavaa.

Kris Kristoffersonip eqqusseriarnini nassuerutigaa, 1000 koruuninillu akiligassinneqarnini aamma akueralugu.

Kris Kristofferson eqqartuussinermi najuutinngilaq, najuutinngikkaluarlunilu eqqartuussiviup aalajangiisinnaaneranik pisinnaatitsissummik allagaqaateqarsimalluni.