Erik Bjerregaard Hotel Arcticimiit soraarniuteqarpoq
Nunatsinni akunnittarfiit tusaamaneqarnerpaat ilaanni pisortaq nuannarineqaqisoq ukiorpassuarni aquttuusimasoq aappaagu 2018-imi tunuartussanngorpoq.
Erik Bjerregaard Hotel Arcticimi ukiuni 25-ni sulisimavoq, tunniusimallunilu sulisimanera pillugu nersornaammik sølviusumik nersornaaserneqartussanngorluni:
- Erik Bjerregaard qasusuilluni eqeersimaartuunermigut aqutseriaatsimigullu akunnittarfinni neriniartarfinnilu kiffartuussinerup pitsaassusaanik annertuumik kivitseqataavoq - tamannalu nuna tamakkerlugu nunaniillu allanit akunnittartunit neriniartartunillu iluarusuutaavoq, Hotel Arcticip siulersuisuini siulittaasoq Ove Nielsen oqarpoq.
AAMMA ATUARUK Erik Bjerregaard sølviusumik Nersornaaserneqartoq
Erik bjerregaard Grønlandsflyjusimasumi, maanna Air Greenlandiusumi, 1977-imi atorfinippoq, Hotel Arcticimilu 1992-imi pisortanngornissi pissutigalugu Ilulissanut nuunnisami tungaanut nunatsinni timmisrtuussinerup qulimiguulinniit suluusalinnut ikaarsaarnissaanut aaqqissuussineq peqataaffigalugu.
Nunatsinnili sulinera aasaru naggaserneqartussanngorpoq, Erik Bjerregaardilu taamanikkussamut 76-ileereersimassaaq:
- Aalajangerniarneq ajornaatsuinnaasimanngilaq maannali piffissanngorpoq sivisuumillu pissarsivioqisumillu sulereernerup kingorna soraarninngornissara qilanaaraara, Erik Bjerregaard oqarpoq.
Hotel Arcticimi siulersuisut siunnersuisarfik Hartmanns aqqutigalugu Erik Bjerregaardip 2018-imi taartissaanut ingerlatseqatigiinnissaq siunertaralugu pisortassarsiornissaq maanna aallartippaat.