Kujalleq Qeqqatalu: Misilittakkanik avitseqatigiinneq nukittorsaataassaaq
Kommunit akunnerminni suleqatigiinnermut isumaqatigiissutigisaminni ilaatigut anguniarpaat meeqqat atuarfiinik pitsanngorsaanissaq isumaginninnermilu suliaqartarnerit ineriartortinneqarnissaat.
- Kommune Kujallerlu qularnanngilluinnaqqissaartumik ilisimasaqarpugut immaqa kommunip aappaata ilisimavallaanngisaanik, Qeqqata Kommuniani borgmesteri Hermann Berthelsen taama oqarpoq.
Kommune Kujalleq Qeqqata Kommuniatalu suleqatigiinnerisigut meeqqat atuarfii pitsanngorsarneqassapput, soorlu ilinniartitsisunik aqutsisunillu pikkorissaasarnerit.
Aamma atuaruk Kommune Kujalleq Qeqqata Kommunialu suleqatigiilerput
Kommunini sulisut piginnaanngorsarnissaminnut periarfissaqarnissaat aamma anguniarneqarpoq, soorlu misilittakkanik avitseqatigiinnikkut.
- Qeqqata Kommuniani uagut inatsisileritooqanngilagut, taava inatsisileritooqarnermut tunngasut Kommune Kujallerminngaanniit, ilaatigut suleqatigiissutigisarpagut. Taamaalilluta kommunip aappaata pisinnaanerusai kommunip aappaata arlaatigut iluaqutigisinnaagai tassani tunngaviuvoq, Borgmesteri Hermann Berthelsen taama oqarpoq.
Kommunini innuttaasunik isumaginninnikkut sulianik ingerlatseriaatsinik pitsanngorsaataasinnaasunik avitseqatigiinnissamut kommunit isumaqatigiissuteqarput, taamaasiornikkut isumaginninnikkut sullissineq ineriartortinneqassammat.
Aamma atuaruk Meeqqat angerlarsimaffiup avataanut inissinneqartartut amerliartorput
Kommunit allat isumaqatigiissusiorfigisimanngisat isumassarsiorfigineqarlutillu misilittagaat paasisassarsiorfigineqarumaartut Hermann Berthelsenip oqaatigaa:
- Nukigut atussavagut pitsaanerpaamik sullissiniarnitsinni, suliamullu aalajangersimasumut ilisimasaqarnerusimagutta, taava kommunit allat oqaluttuuttariaqarpagut. Kommunit allat, soorlu Qaasuitsup Kommunia Kommuneqarfik Sermersoorlu soorunami aamma suleqatigiissutaasinnaasunik ujarlerfigiuaannassavagut, Hermann Berthelsen oqarpoq.
