Eqqumiitsuliortutut inuussutissarsiorsinnaaneq siunnersuutigaa
Qalipaasartut, isiginnaartitsisartut, erinarsortartut, sanaluttartut assigisaasalu iniminnut akiliutissaqarnissartik inuussutissaqarnissartillu ernummatiginagu inuussagunik allamik suliffittaartariaqartarput, naak, eqqissillutik suligaluarunik kusanartorsuarnik inigaqarsinnaagaluarlutik.
Taamaammat eqqumiitsuliortut ilaat Kiiu Olsen ima isumaqarpoq:
- Inuussutissarsiutigineqarsinnaanera ajorluinnarpoq taamaattumik eqqumiitsuliortoqarneq aaqqiivigissagaanni assersuutigiinnarlugu akileraarutitigut taanna oqaloqatigiissutigineqarsinnaavoq akileraarutitigut akileraarsinnaanerat annikillineqarsinnaavoq.
Ilaatigut eqqartorneqarpoq nunani allani naalagaaffiup akiligaanik eqqumiitsuliortut ilaasa aningaasaliiffigineqartarnerat, taamaasilluni minnerpaamik akiligassaminnut akissaqarnissaat qulakkeerlugu sulisinnaaniassammata. Tamakkununngalu qanillattortumik aaqqiisoqarsinnaanera Kiiu Olsenip ujartorpaa:
- Eqqumiitsuliortut ilaat periarfissinneqartariaqarput imannak inuunissaminnik angerlarsimaffeqarlutik sulisinnaallutik ulloq naallugu taavalu aamma inerititaqartariaqarlutik ilaalu ilanngullugit akileraarutitigut aaqqiivigineqarsinnaapput imaluunniit allatigut kisianni aallaaveqartoqartariaqarpoq periarfississagutsigit eqqumiitsuliortut pikkorissut. Taamatut siunnersuuteqarpoq, taalliortoq nipilersortartoq, qalipaasartoq atuakkiortorlu Kiiu Olsen.
