Eqqumiitsuliortoq inuusuttoq Juuntaap Nersornaasiuttagaanik tunineqartoq
Kristine Spore Kreutzmann marriornermik suliaqarneruvoq, ilaatigullu marrarmik Nuup kangerluani katersortakkaminik ineriartortitsilluni misileraasarnini ilisimaneqaatigalugu.
Kristine Spore Kreutzmann qummuattaaqqat, tiitorfiit qallutit, marriat, qulliit marrarnik sanaat, porcelæn aamma savap meqqui atorlugit suliaqartarpoq. Aamma marriat ujalunik, amernik atortussallu allat pinngortitameersut atorlugit misilittaasarpoq, Jonathan Motzfeldtip Aningaasaateqarfiata siulersuisui tusagassiorfinnut nalunaaruteqarlutik taama allapput.
"Juuntaap Nersornaasiuttagaa" pilersaarutaasumit allaanerulaartumik tunniunneqarpoq, Kristine Spore Kreutzmannimi qanittukkut panissaarpoq, taamaammat tunniussineq Sanap ernisarfiani Kristinep ilaqutai Jonathan Motzfeldtillu qitornai najuuttoralugit pivoq.
"Juuntaap Nersornaasiuttagaa" ingammik inuusuttunut – immikkut maluginiagassamik iliuuseqarsimasunut, immikkooruteqarluinnartumilluunniit pikkoriffeqartunut piginnaaneqartunullu ukiut tamaasa tunniunneqartarpoq.
