Qaasuitsup: Eqqugaasut oqaloqateqaqqissapput
Nuugaatsiaq tassaarsuarmit eqqugaammat, malissuup inuit, qimmit illullu amuai. Misigisaq qularnanngitsumik sakkortusimaqaaq nunaqarfimmiullu sunnertisimaqaat.
Nuugaatsiameersut Illorsuarneersullu pisup kingorna illoqarfinnut allanut qimagutitinneqarput inuunerallu ullormiit ullormut allanngorpoq.
AAMMA ATUARUK Tupigusoqaanga amilaarnangaarmat
Taamaammat eqqugaasut tarnip pissusaanik ilisimasalimmik ikiorluarneqarnissaat kommunip pingaartippaa. Sulinerlu nangeqqissaaq.
Karrani tassaarsuaq: Maanna susoqarpa?
Juunip 17-ani ajunaarnersuaq nunatta oqaluttuarisaanerani annersaraat.
KNR tassaarsuarmit eqqugaasut oqaloqatigiartorlugit novembarip qaammataani Uummannamiitsivoq.
Pisut oqaluttuarineri KNR-imi ulluni aggersuni malinnaavigikkit.
Tarnip pissusaanik ilisimasalik ilaqutariinnillu katsorsaasartoq oqaloqateqartarnerit immikoortuisa pingajuat aallartikkiartorlugu Uummannamut novembarip 24-ani tikissasut, Uummannami isumaginninnermut pisortaq oqarpoq:
- Tikittoqartussaavoq (Uummannamut, aaqq.) una qaammat naanerani. Killiffissiuiartortoqassaaq taavalu aamma oqaloqatiginninnissamik periarfissiisoqartussaalluni eqimattakkaanillu katersortitsisoqartussaalluni, pisortaq Nielsine Grønvold Petersen oqarpoq.
Upalungaarsimasuusut tassaarsuaqarnerani ikiuigasuarsinnarput. Nunaqarfiit inui qimagutitinneqarput Uummannamilu katersuutsinneqarlutik. Ikiuigasuartussanit assigiinngitsunit illoqarfinniit allanit tikittunik tamaani ikiorneqarput.
AAMMA ATUARUK Qaasuitsup Kommuniani sulisut uippakajaalersimasut
Ikiueqqaarneq taanna, immikkoortoq siullertut taaneqartoq, julimi naammassivoq.
Tarnip pissusaanik ilisimasallit katsorsaasullu qulingiluat sulinerup immikkoortuata aappaanut atatillugu Uummannaliarput.
Sulinerullu immikkoortuisa pingajuanut alloriaqqinnissaq maanna tullinnguuppoq.
Naak innuttaasut oqaloqateqarnissamik pisariaqatsitsinerlutik namminneq isummertussaagaluartut, kommunip kikkut oqaloqateqartariaqarsorisatik allattorsimasuutigigaat malinnaavigalugillu, isumaginninnermut pisortaq oqaluttuarpoq:
- Inunnik sullissinermut tunngatillugu misigissutsinit aallaaveqartumik suleriuseq aallaavigineqartarpoq. Nalilersuineq, pisariaqartitsinerusutut isigisat qisuariaatsillu assigiinngitsut aallaavigalugit tulleriiaarisoqartarpoq aamma taamaaliorpugut, Nielsine Grønvold Petersen oqarpoq, nangillunilu:
- Siunnersuuteqaqallattaanikuuvunga, soorlu una tutsiutinngimmat qanormita ippa? Taamaattoqartillugu eqqumaffiginissaat pisariaqarpasittarpoq.
