Olsvig: Eqqugaasut ikiorneqassapput
Nuugaatsiami Uummannallu sulluani pisoq alianartoq pillugu isumaginninnermut, Ilaqutariinnermut, Naligiissitaanermut Inatsisinullu atuutsitsinermut naalakkersuisoq, Sara Olsvig, Naalakkersuisut sinnerlugit tusagassiortunik aqqanermut qiteqquttoq katersortitsivoq.
Olsvigip Naalakkersuisut eqqugaasunut misiginneqataanerat ingerlateqqippaa, ilisimatitsissutigalugulu eqqugaasunut maanna ikiorsiinialeruttortut.
- Assut ernumalluta unnuaq tamaat malinnaavugut. Naalakkersuisuninngaanniit oqaatigissavarput Nuugaatsiarmiunutt, ingammik ilaqutaasunut, qanigisaasunut, nunaqarfinni Nuugaatsiap eqqaanniittunut, Illorsuarniittunut Uummannamiittunut inunnullu tupaqqasimasunut qamannga pisumik misiginneqataavugut, Sara Olsvig oqarpoq.
AAMMA ATUARUK Inuit sisamat maqaasineqarput
Naalakkersuisup nunaqarfimmiut, Uummannarmiut, politiit, Issittumi Sakkutooqarfik, upalungaarsimasuutitat, Air Greenland, peqqinnissaqarfik, tarnip pissusaanik ilisimasallit ikiuussimanerannik sulilu ikiuunnerannik- minnerunngitsumillu namminneq kajumissutsiminnik ikiuuttut qujassuteqarfigai.
Unnuaq tassaarsuaqarnerata kingorna inuit ikinnerpaamik sisamat maqaasineqartut politimesterip Bjørn Tegner Bayip tusagassiortunik katersortitsinermi ilisimatitsissutigereerpaa.
Ajunaartoqarsimanersoq uppernarsarsinnaannginnerarpaa.
Nuugaatsiami innuttaasut qimagutitinneqartut ilaat marluk ajoquserujussuarsimapput, arfineq-marlullu annikitsumik ajoqusersimallutik. Illut aqqanillit tassaarsuaqarnerani kuugussaasimapput.
- Nuugaatsiarmiut ulorianartorsiormata Nuugaatsiamiit allamut nuunneqarnissaat pingaarnertut suliarineqarpoq. Uummannami katersortarfimmiikkallarput allatullu qanoq aaqqiisoqarnissaa soorunami misissorneqarpoq.
Ikiuinissamut immikkut aningaasaliisut
- Ajunaarnersuaqartoqartillugu ikiuigasuarsinnaanermut Naalakkersuisut Inatsisartullu aningaasanut inatsisitsinni aningaasaleereernikuupput. Maannalu takusinnaavarput taakku qanoq pisariaqartigineri, taamaammat maannakkut atorneqarput, Sara Olsvig oqarpoq.
Meeqqat oqaloqatigineqassasut
- Tamatuma saniatigut naalakkersuisunit suligasuassaagut, illut aseruatitersimasut nunaqarfiullu qanoq issusaa eqqarsaatigalugit qanoq iliuuseqartoqarnissaanik aningaasatigut qulaajaalluta.
AAMMA ATUARUK Pisoq ilungersunartupilussuuvoq
Nunatsinni nunap sajunnerata kingora tassaarsuaqarneratigut qarsutsisoqarsimanera Danmarkip islandillu naalakkersuisuisa aamma tusarsimavaat.
Ikiuinissartillu aamma kalerriutigereeraat, Sara Olsvig ilisimatitsivoq, angajoqqaanut inersimasunullu ima kaammattuuteqarluni:
- Neriuppunga aamma kaammattuutigissavara; nunarput tamakkerlugu meeqqat inersimasunit ilaquttaminnillu oqaluunneqarluassasut nassuiaanneqassasullu massakkut ikiuineq ingerlammat ikiuisussallu amerlanerit takkutilermata, isumaginninnermut naalakkersuisoq Sara Olsvig oqarpoq.
