Eqqillit Pinnguaataat Inuit Pinnguaataallu suuppat?
Kalaallit timersortartut ukioq manna Arctic Winter Gameseqarnerani ataasinngormat unammisaqattaalerput. Canadami Fort McMurrayimi ukioq manna unammisaqattaartoqarpoq.
Eqqillit Pinnguaataat aamma Inuit Pinnguaataat nunatsinneersut timersuutini arfinilinni peqataaffigisaannut ilaapput. Qanorli pinnguaatigineqartarnersut immaqa eqqarsaatigivat?
Arctic Winter Games
Arctic Winter Games kingullermik 2018-imi aaqqissuunneqarpoq. Tamatuma kingorna Covid-19 pissutigalugu taamaatiinnarneqartaarpoq.
Arctic Winter Games Canadami nunap immikkoortuani Albertami Wood Buffalumi ukioq manna aaqqissuunneqarpoq.
Nunatsinnit timersortartut 67-it peqataapput.
Nunatsinni timersortartut Arctic Sportsimi, Dene Gamesimi, volleyballimi, sulorarnermi, nerrivimmi arsaararnermi snowboardimilu peqataassapput.
Nunatta peqataanerata saniatigut Alaskamit, Alberta Northimit, Northwest Territoriesimit, Nunavik-Quebecimit, Nunavummit, Sápmimit aamma Yukonimit peqataasoqassaaq.
Timersortartut katillugit 1800-it sinneqartut peqataapput.
Eqqillit Pinnguaataat aamma Inuit Pinnguaataat timersuutaapput Issittumi nunap inoqqaavinit pilersinneqartut.
Inuit Pinnguaataanni pinnguaatit Canadameersut, USA-meersut, nunatsinneersut Ruslandimeersullu ilaapput. Eqqillit Pinnguaataat eqqillit Canadap issittortaata akornanni najugallit pinngortitaraat.
AAMMA ATUARUK Assit takukkit: Arctic Winter Games aallartilluartoq
Timersuutit aniguinissamik nuannisarnissamillu siunertaqartut, nunatsinni Inuit Pinnguaataannik nunanut allanut unammisartut sungiusaasuat, Kim Rosing oqarpoq.
Issittumi piniartut aalisartullu silapilunnera unammillernartullu akiorniartuartarsimavaat, pinnguaatinilu nukittussuseq, qasusuissuseq, eqaassuserlu piniarnermut atorneqarsinnaasut qitiupput.
- Ullumikkulli timersornerinnaapput, Kim Rosing oqarpoq.
Isumaasa oqaluttuassartaat
Arctic Winter Gamesimi Inuit Pinnguaataannik unammissutsit aqqaniliupput. Eqqillit Pinnguaataanni unammissutsit tallimaapput.
Unammissutsit tamarmik oqaluttuassartaqartut assersuutigalugu qisuminermik noqqoruunnermi imaluunniit Isikkanik-Marlunnik Qummut Isimmeeriarnermi unammisut akornanniikkaanni pinnguaatit pinngoqqaarnerat oqaluttuaripallanneqartarpoq.
Qisuminermik noqqoruunneq Eqqillit Pinnguaataanni pinnguaataavoq, tassani timersortartut marluk akileriillutik qisumineq akornimminiittoq noqqoruttarpaat. Qisumineq tanitaavoq, taamaammat pujappoq, taannalu tigummilluarnerpaaniarnissamut tunngalluni.
Qisuminermik noqqoruunneq assannut paffimullu nukittorsaatitut pinnguaataasimavoq. Eqqillit imaanit aalisakkamik angisuumik tigusilluni aalisartarsimapput, taamaammat tigulluaanissaq nukeqarluarnissarlu pisariaqarluni.
Inuit Pinnguaataanni pinnguaatit marluk tassa Isikkanik-Marlunnik Qummut Isimmeeriarneq aamma Isikkamik-Ataatsimik Qummut Isimmeeriarneq portusuumut isimmitsisinnaanermut tunngavoq. Isikkamik-Ataatsimik Qummut Isimmeeriarnermi arsaaraq puisip amianik sanaajusoq silaannarmiittoq isikkamik ataatsimik eqqoriarneqartarpoq. Isikkanik-Marlunnik Qummut Isimmeeriarnermi nissut avissaangatinnagit arsaq isikkanik-marlunnik eqqoriarneqartarpoq.
Isikkanik-Marlunnik Qummut Isimmeeriarneq Inuit Pinnguaataanni ajornarnerpaat ilaattut isigineqartarpoq.
Uani Randi Sigurdsen issikkanik-marlunnik qummut isimmitseriaasoq takuneqarsinnaavoq. Taanna arnani inuusuttuni kuultinnappoq. Assi: Arctic Winter Games International Committee and AWG 2023 Host Society.
Nunanut allanut unammisartunut sungiusaasup Kim Rosingip qummut isimmeriaanermi pinnguaatit piniarnermi kalerriinermut tunngassuteqartumik oqaluttuassartaqarnerarpai.
- Isikkamik-Ataatsimik Qummut Isimmeriaaneq piniartup pisaqarsimaneranik ungasianiit kalerriineruvoq. Isikkanik-marlunnik kalerriineq pisaqarsimannginneruvoq, taanna oqarpoq.
Nipaassuseq isumaliutiginnilluarnerlu
Arctic Winter Games 2023-mi Eqqillit Pinnguaataannik aamma Inuit Pinnguaataannik unamminerit Fort McMurrayimi timersortarfissuarmi MacDonald Island Parkimi ingerlanneqarput. Timersortarfiit marluk atorneqartut sanileriipput.
Qisuminermik noqqoruunnermik aamma Isikkanik-Marlunnik Qummut Isimmeeriarnermik ataasinngornermi ualikkut unammisoqarpoq, Eqqillillu Pinnguaataanik timersuutinit Inuit Pinnguaataannik unammiffimmut timersortarfiup aappaanut ikaaraanni silaannaq allaanerusoq ersarilluinnarpoq.
Nunatsinnit Inuit Pinnguaataanni aamma Eqqillit Pinnguaataanni unammeqataasut
Inuit Pinnguaataannik aamma Eqqillit Pinnguaataannik unamminerit ingerlallualereerput, nunatsinniillu angusarissaarluartoqalereerluni. Nunatsinneersut maannamut kuultit sisamat, sølvit pingasut bronzellu arfinillit pissarsiarereerpaat.
Nunatsinnit Arctic Winter Gamesimut peqataasut katillugit 65-iupput. Taakkunannga arfineq-pingasut Eqqillit Pinnguaataannik unammisuupput 18-illu Inuit Pinnguaataannik unammisuullutik.
Nunatsinnit Eqqillit Pinnguaataannut angutinik taamaallaat peqataasoqarpoq. Inuit Pinnguaataanni unammissutsini tamani nunatsinnit peqataasoqarluni.
Eqqillit Pinnguaataannik unammisussat højtalerikkut oqaatigineqartarput, unammisorlu iluatsitsereeraangat nipituumik suaartartoqarlunilu qiimmassaasoqartarpoq.
Inuit Pinnguaataannik unammisoqarfiusumi tamanna muminganiippoq. Tassanimi timersortartut puisip amianik arsaaraliamik eqqugaqaraangata sivikitsumik ersaartaattoqartarpoq, unamminerillu nipaalluinnangajattumik ingerlanneqarput.
Kikkulli tamarmik tunniusimalluartut ersarilluinnarpoq, Kim Rosingillu nipaassuseq isumaliutiginnilluinnarnermut takussutissaasoq nassuiaatigaa.
- Qummut isimmeeriarnermik unamminermi isumaliutiginnilluinnarnissaq pisariaqarpoq. Taamaammat nipaalluinnartoqarpoq, nunanut allanut unammisartut sungiusaasuat oqarpoq.
Kingusinnerusukkullu Pukusuk Atorlugu Noqqoruunnermi unamminerit aallartipput, tassa timersortartut marluk niaqquminni tasisartulerlutik pukutsuminni nukiit atorlugit tasisartoq unammisami niaquaniit peerniarsarisarpaat.
Pukusuk Atorlugu Noqqoruunneq aallartimmat Inuit Pinnguaataannik unammiffimmi silaannaq allanngorpoq, Eqqillillu Pinnguaataannik unammisoqarneratulli nipituumik suaartaattoqalerpoq.
Timersortartorpalaarneq
Timersortartut akornanni ingerlaaraanni timersuutit taakku marluk akornanni timersortartorpalaassutsit qanoq pitsaatiginera malugineqapallassinnaavoq.
Peqataasup arsaaraq puisip amianik sanaajusoq siullermeerluni eqqunngitsooraangagu allat ornigutipallallutik siunnersuuteqapallattarput. Aamma naak ilagiinnit assigiinngitsuneeraluarlutik angusarissaarluarnerunissamik unamminermut tunngagaluartoq.
Tassungalu pissutissaqarluartoq, nunanut allanut unammisartut sungiusaasuat, Kim Rosing oqarpoq.
Inuit Pinnguaataat imminut unammillerneruvoq. Imminut pitsaanerpaamik angusaqarnissamut tunngavoq. Taamaammat kikkut tamarmik ikioqatigiittarput, taanna oqarpoq.
