Isornartorsiuineq: Eqqartuussiveqarnermut aningaasaliissutit ikippallaartut
Danskit naalakkersuisuisa aappaagumut aningaasanut inatsisissatut siunnersuumminni, nunatsinni eqqartuussiveqarfinnut 2021-ip tungaanut immikkut 10 mio. koruunit immikkoortinniarmatigit ajunngilaq – naammanngillalli.
Inuit Ataqatigiinniit folketingimut ilaasortaq, Aaja Chemnitz Larsen KNR-imut oqarpoq.
- 40 mio. koruunit eqqartuussiveqarnermut siuarsaataasinnaassanersut isornartorsiungaatsiarpara.
AAMMA ATUARUK Eqqartuussiveqarfiit 40 mio. koruuninik aningaasaliiffigineqarput
Aningaasat eqqartuussiveqarnermut atorneqassapput – tassa nunatsinni eqqartuussivinni suliaqarnermut. Tassanili inatsiseqarnermut suliaqarfimmi tassa politiit pinerlussimasunillu isumaginnittoqarfik ilaapput, taakkulu siarsaavigineqartariaqartut, Aaja Chemniz Larsen isumaqarpoq.
- Assersuutigalugu politiit eqqartuussivinni unnerluussisussaatitaasuullutik illuatungaaniittarput. Taamaammat inatsiseqarnerup nalinginnaasumik siuarsaavigineqartariaqarnera pingaartuuvoq.
Nunatsinnilu inatsiseqarnermut suliaqarfik Danmarkimut sanilliullugu aningaasatigut piginnaasatigullu atugarliornerusoq, Kalaallit Nunaannut ataatsimiititaliami siulittaasup, attaviitsup, Aleqa Hammondip aamma tikkuarpaa
AAMMA ATUARUK Inatsisinik atuutsitsinermut tunngasut nukittorsarnissaat itigartitsissutigineqartoq
Partiit V aamma DF: Eqqartuussiveqarnermut aningaasaliissutit aallarniutaapput
Inatsiseqarnermut ministereqarfik naapertorlugu danskit naalagaaffiat nunatsinni eqqartuussiveqarfinnut qassinik atuisarnera nalunaarsorneqanngilaq. 2018-imulli aningaasanut inatsisisissatut siunnersuut naapertorlugu naalagaaffeqatigiiffiup eqqartuussiveqarnermut aningaasartuutai tamaasa katillugit 2,47 mia. koruuniupput.
Aningaasat 40 mio. koruunit aalajangiunneqartut aallarniutaasut, Hans Brodersen, Dansk Folkepartimeersoq isumaqarpoq. Aningaasalli sukkasuumik atorneqaratarsinnaanerat nassuerutigaa.
AAMMA ATUARUK Inatsisit atortinneqarfiata pitsanngorsaavigineqarnissaa taperserneqartoq
- Assersuutigalugu (Kalaallit Nunaanni, aaqq.) angalanermut illusimaffinnullu aningaasartuutit qiviaraanni atuipallattoqarsinnaavoq, Hans Brodersen oqarpoq nangillunilu:
- Aningaasat aalajangiussat naammannersut takoqqaariartigit. Amigaattoortoqassappallu misissoqqissavarput allatut iliorsinnaanngilagut.
Danskit nunatsinni akisussaaffigisaanni Danmarkimi pitsaassuseq assigissagaa, nunatsinnili atugassarititaasut peqqutigalugit allaanerusoqarsinnaasoq, danskit naalakkersuisuisa tunngavilersuineranni allassimavoq.
AAMMA ATUARUK Olsvig: Aap, nalunaarutiliortoqartannginnera pitsaanngilaq
Venstrep nunatsinnut tunngasunik oqaaseqartartua, Marcus Knuth naapertorlugulu aningaasat 40 mio. koruniit aqqummi aallarniutaannaapput.
- Aningaasat amerlasoorujussuusoraakka. Naggammillu taamaaliunngilagut. Kalaallit Nunaanni Namminersorlutik Oqartussat politiillu qanoq pitsanngorsaasinnaanitsinnik oqaloqatigiissuteqarfigisarpagut. Taamaammat Kalaallit Nunaanni eqqartuussiveqarnermut inatsiseqarnermullu pitsanngorsaaniarnitta alloriarnerisa ilagigaat isigineqassaaq.
Folketingimi Kalaallit Nunaannut ataatsimiititaliap siunnersuut naalakkersuisunut nalunaarutiginiarlugu akueraa. Ataatsimiititaliap ilaasortat assigiinngitsut 40 mio. koruunit qanoq isumaqarfigineraat uani uparuarpaa.
