Eqqagassat pillugit ilinniarneq nutaaq
Namminersorlutik Oqartussat, kommunit Saviminilerinermut Ilinniarfillu ataatsimoorlutik eqqagassalerinermi teknikeritut ilinniartitaaneq nutaaq pilersippaat.
Ilinniartitaanerup nutaap eqqagassanik pitsaanerusumik passussisarnissaq qulakkiissavaa nunatsinnilu avatangiisinut sulliviit sunniuteqarluarnerusumik ingerlanneqarnissaat qulakkiissallugu.
Tamatuma saniatigut sulisut eqqagassalerinermik suliaqareersut pikkorissarnissaat piginnaasaqarnerminnullu allagartaqalernissaat ajornarunnaarsinneqassaaq.
- Ikuallaavinnik ingerlatsinermi aammalu eqqagassanik navianartunik tigooqqaavinni ilinniarsimasunik sulisoqarnissamik annertoorujussuarmik pisariaqartitsillutik kommunit oqariartuutigaat, taamaattumik nutaatut eqqagassalerinermut suliassaqarfiup iluanerpiaq ilinniartitaanermik neqerooruteqarnissaq iluatsimmat nuannaarutigisorujussuuara, Pinngortitamut Avatangiininullu Naalakkersuisoq, Mala Høy Kúko nalunaarpoq.
Ilinniartitaaneq nutaaq taanna assartugalerisutut ilinniartitaanermut, Saviminilerinermut Ilinniarfimmi neqeroorutigineqareersumut, nangitsivissatut atorneqassaaq.
Assartugalerisutut ilinniarneq ukiunik appaata affaanik sivisussuseqarpoq, tamatuma kingorna eqqagassalerinermi teknikeritut immikkut pikkorissarluni ilinniarneq suli aamma ukiunik aappaata affaanik sivisussuseqarluni. Taamaalilluni eqqagassalerinermut teknikerit naammassisut siulliit 2018-imi ilinniarnerminnik naammassissapput.
Eqqagassalerinermi teknikerit nutaat taakkua ilaatigut uuliakunik aamma akuutissanik uumaatsunik igitassanik passussinissaq, eqqagassalerinermut oqartussaasut piumasaqaataat, atoqqiineq aamma eqqakkanik passussinermut tunngatillugu isumannaallisaaneq ilinniassavaat. Qulequttat taakku tamarmik eqqagassalerinermut suliassaqarfimmi Kalaallit Nunaanni unammilligassanut tunngassuteqartut.
