CAMP CENTURY Eqqagassat naatsorsuutigisamit siammaqqanerusut
Sorsunnerup nillertup nalaani Sermersuarmi amerikamiut sakkutooqarfigisimasaanni Camp Centurymi GEUSimit ilisimatuut ulluni 82-ini sermimeereerlutik taama nalunaaruteqarput.
Ilisimatuut nalunaarsuiartorlutik juunimi sakkutooqarfiusimasumukarput, sermimi misissugassanik katersillutik, nakkutilliissutinillu atortulersuillutik sermimik, silamik anorimillu tamaani uuttortaasussanik.
AAMMA ATUARUK Misissuinerit aallartinneqartussanngortut
Ilsimatuut eqqakkani nassaatik pillugit tupigutsannartunik nassaareerput. Eqqakkat naatsorsuutigisamit itinerusumiipput siammarnerusimallutillu, GEUSimi ataqatigiissaarisoq William Colgan oqarpoq.
- Paasisarput siulleq tassaavoq eqqagarsuit ilimagisamiit siammarnerusimanerat aammalu sermimi itinerusumiinnerat. Sermersuarmi 30 meterit ilaatigullu allaat 95 meterisut ititigisumiipput. Naatsorsuutigisatsinniit siammasinnerupput, taanna oqarpoq.
Eqqakkat qalliit atortussiaarpasipput alliillu imerpalasoorpasillutik. Tamannalu ajunngilaq imerpalasummi aallutik kuugussaanissaat taamaalilluni millissaaq.
AAMMA ATUARUK Ilisimatuut: Camp Century avatangiisinut ulorianarsinnaavoq
Camp Century pillugu oqallinneq 2016-imi aallartippoq, taamani ilisimatuut nunani assigiinngitsuneersut inerniliimmata amerikamiut eqqagakui silap pissusaata allanngornerani aallutik mingutitsisinnaanerat aarlerisaarutigimmassuk. Imalu kiatsikkiartuinnarpat 2090-imi tamanna ilimagineqarsinnaasoq.
Taama inerniliinerisa kalaallit politikerii danskit naalakkersuisuinut qisuariartippai sakkutooqarfiusimasumik nakkutiginninnissamut, maanna GEUSip suliarisaanik.
Sermimilli qillerinerup ersersippaa ukiut untritillit atukkatta ingerlaneranni eqqakkat seerilernavianngitsut, William Colgan oqarpoq. Misissuinerimmi ersersippaat sermersuup qaavanut sermit qaleriiaarpassuusut.
- Aput nakkaraangat 10 procentia ukioq taanna aattarpoq. Apulli aanngittoortoq aattumiit suli annertunerusarpoq.
AAMMA ATUARUK Immikkut ilisimasalik: Imeq Camp Centurymeersoq uloriananngilaq
Danskit peqqinnissaqarfianeersut maanna sermimit misiliutit misissussavaat, GEUS-illu ukiumi aggersumi radarinit assilisat, uuttortaanerillu ingerlaavartut misissuiffigeqqissaartassavai.
AAMMA ATUARUK Greenpeacep Camp Centurymik misissuiniarneq nuannaarutigaa
