Eqalugaarsuit aserorterisut unittoortippaat

Eqalugaarsunni Pilersuisup pisiniarfianut unnuaq tillinniat silarutaasavissimagunarput. Tassami aserortersimavaat qarasaasiat, serverit, assiliiviit alapernaarsuutit karsilu. Pisiniarfik, aningaaserivik allakkerivillu ullumikkut matoqqatinneqarallarput.

- Soorunami sapinngisarput tamaat ilungersuutigaarput ingerlatsinerup ammaqqinnissaa. Kisianni tassa allatut ajornartumik ullumikkut matoqqasariaqarpugut, Pilersuisumi niuertarfeqarnermut pisortaq Frederik Olsen KNR.gl-mut oqarpoq.

Pilersuisup Eqalugaarsunni pisiniarfianit maannamut oqaatigisinnaanngikkallarpaat tillinniarneq qanoq naleqarsimanersoq.

- Maannamut takusinnaasakka malillugit imigassaasivipput aserorlugu ammarsimavaat taamatuttaarlu karsi aamma aserorneqarsimalluni. Tilliniat aamma qarasaasiat serverillu aserortersimavaat. Taamaammat maannakkuugallartoq tillitat qanoq naleqarnersut oqaatigisinnaanngikkallarparput, Eqalugaarsunni Pilersuisumi niuertoq Jakobine Poulsen KNR.gl-mut taama oqarpoq.

Attaveqarnerup ingerlatsinerullu qanoq piaarnerpaamik aallarteqqissinnaanissaa maanna Pilersuisumit misissorneqaleruttorpoq.

- Neriuppugut pisiniarfipput aqagu ammaqqissinnaajumaartoq, Jakobine Poulsen oqarpoq.

Eqalugaarsunni kommunefogedip pisimasoq maanna misissuiffigaa.