EPI: Qineqqusaarnermi eqqumiitsuliorneq pingaartinneqarli
Kulturi pillugu nassuiaatip kiisalu eqqumiitsuliorneq kulturilu pillugu naalakkersuisut periusissiaata Inatsisartunut tunniunneqqarnissaat innuttaasunullu saqqummiunneqarnissaat sioqqutilaarlugu aappassaanik qinersisoqartussanngornera EPI innersuussutigaa.
Siullermik, kulturi pillugu inatsisartunut nassuiaatip saqqummiunneqarnissaa piareermat marsimi 2013-imi Inatsisartunut qinersitsinissaq suaarutigineqarpoq, nassuiaammullu ilaagaluarpoq eqqumiitsuliornermut kulturimullu 2014 – 2017-imut periusissiaq avammut saqqummiunneqarnissaminut Inatsisartunullu tunniunneqarnissaminut piareeqqasoq, maannali aamma qinerseqqittoqarnissaanik suaaruteqartoqaqqippoq.
Kulturi pillugu kingullermik 2004-mi nassuiaasiortoqarsimanera EPI-p erseqqissaatigaa.
- Pisariaqarluinnalerpoq eqqumiitsuliortut atugaat malunnaatilimmik pitsanngorsaaffiginissaat, ingammillu inatsisiliornikkut, taamaalilluta immikkuullarissumik pisortatigoortumik eqqumiitsuliorneq
pillugu inatsiseqalissammat. Eqqumiitsuliornermut inatsisissap eqqumiitsulioriaatsit katersuuffigissavaat, soorlu, filmiliortarneq pillugu inatsit, Isiginnaaritsisarneq pillugu inatsit, atuakkiorneq pillugu inatsit, il.il., EPI taama allappoq.
- Qineqqusaarnermi eqqumiitsuliorneq pingaartinneqarli , Eqqumiitsuliornikkut Pinngorartitsisut Ingerlatsisullu taama kajumissaaruteqarput.
