Rosing: Enoksenip aalisarnermut politikki kukkusoq ingerlappaa

Aalisarnermut naalakkersuisoq Hans Enoksen pisassiissutinut tunngatillugu biologit tusaaniarnerunagit aalisartut piniartullu tusaaniarnerussallugit politikkia pitsaanngilaq. Demokraatit sinnerlugit inatsisartuni ilaasortaq Michael Rosing taama oqarpoq.
Assi © : Helle Nørrelund Sørensen
novembarip 23-at 2016 05:57

Pinngortitaleriffimmi biologit aalisarnermut politikki aquttussaanngikkaat,  
aalisarnermut naalakkersuisup Hans Enoksenip inatsisartuni sapaatip-akunnerata siuliani apeqqarissaarfigineqarnermini oqaatigaa.

Aamma atuaruk Hans Enoksen: Aalisartut piniartullu sunniuteqarnerussapput

Hans Enoksenip Aalisarnermut Piniarnermullu siornatigut naalakkersuisuunermi nalaani misilittagai Michael Rosingip innersuussutigai:

- Hans Enoksenip aalisartut biologinit taamani tusaaniarnerujussuuai. Tamatumalu kinguneranik assagiarsoqassuseq ajalusoorpoq. Biologit tusarnaarsimagaluarunigit ullumikkut aalisarsinnaasagut pingajorarterutaannaannavianngikkaluarput. 

- Misilittakkanilumi eqqaalaaginnarsinnaagaluarpai, kukkulerninilu takullugu, Michael Rosing oqarpoq.

Aalisarnikkut politikkimik aaqqissuussinermi aalisartut innersuussutaat salliutinneqarnerusariaqartut, aalisarnermut naalakkersuisup Hans Enoksenip oqaatigereerpaa.

Biologimmi innersuussutaat kisiisa malinneqassappata pinngortitaq uumasuusivinngortinneqassasoq, naalakkersuisoq isumaqarpoq.

Biologilli siunertaraat siunissami pisassaqartuarnissaq, Demokraationeersoq naalakkersuisumut isornartorsiuivoq.

- Biologi aperigaanni assigiinnarpaa uumassusilerinermi ilisimasaqarfissuaq aperalugu. Aalisartorlu aperigaanni nammineq ilisimasani, ikinngutaasa ilaqutaasalu ilisimasaat, aallaavigalugit paasissutissiissaaq, ilisimasalli taakku biologit ilisimasaannut sanilliullugit piffinni aalajangersimasuneerput, Michael Rosing oqarpoq.