Enoksenip qaleralittassiisarneq allanngortikkusukkaa

Qeqertarsuup tunuani qaleralittassat ukioq manna 9.200 tonsiupput, 2016-imi aamma taama amerlatigisunik pisassiisoqarnikuuvoq.  

Maanna ukioq aallartilaaginnartoq qaleralittassat nungunnissaat aalisartunit ernumagineqalereerpoq.  

- Ukiup naajartornerani aningaasat pisariaqarteruttornerisa nalaani aalisarnerup unitsinneqartarnera ernumanarpoq, aalisartoq Pele Blytmann KNR-imut oqarpoq. 

Tamanna aamma Sinerissat Qanittuani Aalisartut Piniartullu Kattuffiannit ernumassutigineqarpoq. Kattuffiullu qaleralittassat amerlineqarnissaat pissusissamisoorsoraa. 

- Akuersissutaatillik amerliartortillugit pisassiissutit malinnaatinneqarnissaat pissusissamisoortutut isigaarput, SQAPK-mi pisortaq Erik Lange KNR-imut oqarpoq. 

Umiatsiaararsorlutik qaleralinniat ‘paggatassinneqaratik’ immikkut tamarmik pisassinneqartalernissaat  KNAPK-mit piumasarineqarpoq. 

- Aalisarneq illersorneqarsinnaasumik imminullu akilersinnaassaguni saneqqunneqarsinnaanngilaq aqunneqarsinnaasumik periuusissamik massakkut eqqussisoqartariaqarpoq, KNAPK-mi siulittaasoq Henrik Sandgreen KNR-imut oqarpoq.
Aalisartut pisassaaruttarnerat toqqissisimanarinagu aalisarnermut naalakkersuisup, Hans Enoksenip oqariartuutigaa.

Aalisartullu ilaquttaminnik inuiaqatigiinnillu napatitsisinnaanissaat qulakkeerniarlugu aaqqiissuteqarusuppoq.  

- Takusinnaavarput aalisartut pisassakilligaluttuinnartut. Allaat selskabit qaleralittassaateqalernikut aammalu inuit ikittunnguit pisassanik inuiaqatigiit pigisaannik amerlasoorparujussuarnik iluaquteqartut amerlaqisullu missukutaasutut inissisimallutik. Taakkua illuatungaanut sangutinneqartariaqarput, Hans Enoksen oqarpoq.

Taassuma aalisarnermut inatsit aqqutigalugu pisassat siammasinnerusumik agguaanneqartalernissaat sulissutiginiarpaa.  

- Pisassat siammasinnerusumik agguaanneqarnissaat aqqutissiuukkusupparput, Hans Enoksen KNR-imut oqarpoq. 

Qanoruup sammisaq pillugu ilanngutassiaa ataani takuuk.