Enoksen ukiut sisamat qaangiuppata namminiilivikkusuttoq
Enoksenip partiip naalakkersuisooqatimi Siumup nunatta namminiilivinnissaanut ulluleerusunnginnera naammagisimaanngilaa.
- Taanna assut uannut pakatsinarpoq nalunnginnakku Siumut pimoorussiuaannartut namminersulivinnissamik naalagaaffinngornissamut, Hans Enoksen Nanoq Mediamut oqarpoq.
AAMMA ATUARUK Selvstændighed på en ordentlig måde
Partii Naleraq namminersulivinnissamik maanna suliaqarnerunialersoq Enoksenip oqaatigaa. Ukiormi 2021 naalagaaffittut namminersulivinnissatsinnut aallaavigissallugu kajuminnarpoq tassami Hans Egedep nunatsinnut tikinneranit ukiut 300-nngussapput.
Hans Enoksenip nunatta Danmarkimiit anineratigut naalagaaffiup ukiumut tapiissutai ukiuni sisamani 3,7 milliardiusut annaaneratigut innuttaasut inuuniarneranut tamanna kingunerlussinnaanera ernumatiginngilaa.
- Ullumikkut ingerlatsineq ima akisutigivoq, marloriaammik suna tamaat akilersorlugu ingerlavugut, tikisitarparujussuit tikisittaqattaarpagut, arlasuut nammineq maani pinngortissinnaasaraluagut, sulisissinnaasaraluagut atunngilagut, Enoksen oqarpoq.
AAMMA ATUARUK Siumut namminiilivinnissamut aqqutissiuussissaaq
Sulisinnaasunik ullumikkut sulisussatut tikisitat aningaasanik piffissamillu pikkorissarnerminnut atueriarlutik nunatsinnit aallaqqittartut, Naalakkersuisut siulittaasorisimasaata Nanoq Mediamut oqaatigaa.
Taassuma aningaasat taakku maannakkut inuuniarnermut tunngasunut atorneqartariaqarsorai.
- Taamaattumik taamatut sioralluni eqqarsaannarneq qimanneqartariaqarpoq, allannguisinnaakutsoorpugut, ullumikkorniit akikinnerujussuarmik ingerlatsisoqarsinnaalissaaq takusinnaasagut, Nanoq Mediamut oqarpoq.
Namminersorlutik Oqartussat ukioq manna 6,7 milliardit koruuninik missingersuuteqartut 2017-imut aningaasanut inatsimmi atuarneqarsinnaavoq. 3,7 milliardit koruunillu danskit naalagaaffiannit tapiissutaapput.
AAMMA ATUARUK Namminersulernermut aqqut akisuallaalersinnaavoq
