Makitsineq: Emanuel Nuko Partii Naleqqap siullertut sinniisussarigaa
Emanuel Nuko Partii Naleqqami sinniisussatut siullertut makinneqarpoq. Tassalu Partii Naleraq naalakkersuisoqatigiinniissappat, Hans Enoksenilu Inatsisartunit sulinngiffeqassappat, Nuko Partii Naleqqap Inatsisartuni sinniisorissavaa.
Ilaatigut tamanna Qinersinermi ataatsimiititaliap ullumi nalunaaqutaq pingasunut makitsinerata inerneraa.
Emanuel Nuko Anthon Frederiksenilu qinersinermi tamarmik immikkut 71-init taaguunneqarput, taamaammallu sinniisussaq siulleq makitsissutigineqartussanngorluni. Emanuel Nukolu sinniisussatut siullertut makinneqarpoq.
Aamma Partii Naleraq sinnerlugu qineqqusaartut Kattie Nielsen Ole Danielsenilu 49-nit immikkut taaguunneqarmata, partiip sinniisussaasa tallimaat arfernallu makitsissutigineqarpoq. Sinniisussarlu tallimaat tassaavoq, Kattie Nielsen.
Demokraatit sinnerlugit qineqqusaartut Rachel H. Ingemann Mark Mølgaardilu tamarmik immikkut 36-nit taaguunneqarmata, partiip sinniisussaasa sisamaat aamma makitsissutigineqarpoq. Tassanilu Rachel H. Ingemann makinneqarpoq.
Nunatta Qitornaasa sinniisussaasa pingajuannut aamma makitsisoqarpoq. Tassanilu Pavia Geisler makinneqarpoq. Taanna Godmand Petersenilu aqqanilinnit taaguunneqarput.
AAMMA ATUARUK Qinersinermi ataatsimiititaliami makitsinerit pingasut ingerlanneqartussanngortut
Qinersinermi ataatsimiititaliamut ilaasortat tassaapput Naalakkersuisut siulittaasuata naalakkersuisoqarfiani pisortaq, Søren Hald Møller, biskoppi Sofie Petersen aamma kommunit kattuffianni pisortaagallartoq Pétur H. Gudmundsson.
Klaus Georg Hansenip paasissutissiissutigaa qinigaasut allattorsimaffiat politiinut qinersinerup aqaguani tunniunneqartoq. Qinigaasut pinerluuteqarsimanersut politiinit misissorneqartussaanera tamatumunnga pissutaavoq, misissuinerullu inernera inatsisartunut tunniunneqassaaq.
