Elite Sport Greenland angusassat pillugit isumaqatigiissuteqaqqittoq

Angusassat pillugit isumaqatigiissummi atuarneqarsinnaavoq Elite Sport Greenlandip 2020-p tungaanut iliuusissatut pilersaarutimi aaqqissuussaalluartumik ingerlatsinikkut piginnaaneqarluartunik amerlanerusunik pilersitsisalernissaq anguniaraa.
 
Taamaammat ilinniartoqarfiit suleqatiginissaannik isumaqatigiissuteqartoqassaaq. Tamannalu timersornermut atatillugu piginnaaneqarluarlutik piukkunnaatillit timersuutimik aallunnerata saniatigut ilinniagaqarnermik ingerlatsinissamut periarfissaannik pitsaanerulersitsissasoq, Elite Sport Greenlandimi siulittaasoq, Malik Hegelund Olsen, taama oqarpoq.

AAMMA ATUARUK Elite Sport Greenlandip piginnaasaqarluartoq tapersorpaa

Aammattaaq meeqqat inuusuttullu qaffasissumik timersortartutut ineriartornissamut periarfissat pillugit annertunerusumik paasitinneqartassapput.
 
Kultureqarnermut naalakkersuisoq, Doris Jakobsen Jensen, isumaqarpoq nunatsinni qaffasissumik timersorneq sapinngisamik pitsaanerpaamik tapersersorneqassasoq:

- Naalakkersuisut pingaartutut isigivaat qaffasissumik nalinginnaanerusumillu timersortarnerup sapinngisamik pitsaanerpaamik tunngavissaqartinnissaa, taamatut iliornikkut timersortartut peqataasartut nunarsuup sinneranut piginnaanerminnik takutitsilluarsinnaaleqqullugit, Doris Jakobsen Jensen taama oqarpoq.