Politikki

Elbæk: Kiserliornarsinnaavoq

Aleqa Hammond Siumumit ilaasortaajunnaarsinneqarnermi, taamatullu aamma Folketingimi gruppit anginersaanni ilaasortaaffimminik annaasaqarnermi kingorna, politikkikkut angusaqarniassaguni ilungersortariaqassaaq.

Allattoq Jonas Fievé

aggustip 26-at 2016 05:56

Nutserisoq Simon Uldum -

Uffe Elbæk, De Radikalenit ilaasortaajunnaarnermi kingorna, siorna qinersisoqarnissaata tungaanut Folketingimi attaviitsuusoq taama oqarpoq.

- Attaviitsuulluni suliatigut attaveqarnikkullu pitsaasumik inissinniarnissaq ilungersuutigisariaqarpoq, taamaaliunngikkaannimi kiserliornartupilussuussaaq, Uffe Elbæk KNR-imut taama oqarpoq.

Uffe Elbæk Folketingimut 2011-mi qinigaavoq taamanilu naalakkersuisuusuni kultureqarnermut ministerinngortinneqarluni.

Kingornali ministeritut tunuarpoq De Radikaleniillu aamma ilaasortaajunnaarluni, taamaammat attaviitsutut kisimiilluni ingerlaniarneq ilisimalluarpaa.

Aamma atuaruk Socialdemokraatit Aleqa Hammond suleqatigiunnaaraat

Attaveqarluarnissaq pingaarluinnartoq

Uffe Elbækillu attaviitsunngorumaartut siunnersorpai pitsaasumik allatseqaqqullugit aammalu ilinniartumik sulisoqaqqullugit.

- Tamannalu inissinneqareerpat suliatigut pitsaasunik attavissarsiornissaq isumagisariaqarpoq aammalu Folketingimi gruppit arlaannut ilaanngikkaluarluni ilaasortaqatit sorliit oqaloqatigisinnaanerlugit, kikkut qaninnerunerlugit nalornigaannilu kimit siunnersortissinnaanerluni qulakkeerniartariaqarpoq, Uffe Elbæk KNR-imut taama oqarpoq.

Aamma atuaruk Aajap Aleqallu Folketingimi suleqatigiinnerat killeqartupilussuaq

Ataatsimiititaniinngikkaluarluni ingerlalluartoqarsinnaavoq

De Radikalet Folketingimi gruppiannit ilaasortaajunnaarnermi kingorna partiit saamerliusut isumaqatigiissuteqarfiginissaat iluatsippaa taamaalillunilu ataatsimiititaliani ilaasortaaffigisani pigiinnarlugit. Aleqa Hammondili ataatsimiititaliani ilaasortaanngikkaluarluni politikkikkut angusaqarsinnaavoq.

- Ajornanngilaq, periarfissalli suut atussanerlugit ataasiakkaat namminneerlutik aalajangigassaraat, eqqarsarluaraannimi angusaqarusussuseqarluarlunilu, taava politikkikkut isummat anninnissaannut periarissarpassuaqarpoq, Uffe Elbæk oqarpoq.

Aamma atuaruk Aaqqissuisuuneq: Aleqa Folketingimi ilungersortussanngorpoq

Taassuma attaviitsuunermini partii Alternativet pilersippaa, partiilu qinersinermi kingullermi Folketingimi qulinik ilaasortaatitaqalerpoq.

Aamma atuaruk Alternativet nunatsinnut tunngatillugu politikkissani pillugu ataatsimiigiaqqusisoq