"El Niño" nutaaq aggerpoq
Nunarsuarmi silasiorfiit annerit ilaat pingasut, tassa Immat silaannarlu pillugit USA-mi misissuisarfik NOAA, Japanimi Australiamilu silasiorfiit taama nalunaaruteqarput.
Manerussuarmi imaq ima kissartigaaq silap pissusia El Niño ukioq manna uteqqikkumaartoq. Silasiorfiit pingasut taakku isumaqatigiissumik taama oqaaseqaateqarput. Tv-qarfik CNN taama nalunaaruteqarpoq.
El Niño sakkortuumik kingullermik eqquigami tamanna 1997-imi 1998-imilu pivoq, assersuutigalugu USA-mut qulit aamma 25 milliardit dollarit akornanni taamanikkut naleqarluni.
El Niño sakkukitsuinnaq 2009-mi pinngorpoq, assersuutigalugu Indiami ukiumoortumik siallerujussuartarnera, tassa monsunertarnera pisarnermit sakkukinnerulluni, sioraasallu taamanikkut aamma akitsorujussuarlutik.
El Niño takkuppat Asiami qaqorteqqasussanik tunisassiorneq eqqorneqarsinnaavoq. Tamanna ernumanarsinnaavoq, tassami Nunarsuarmi qaqorteqqasussat 90 procentii tamaani naatinneqartarmata.
El Niño pisarnermit sakkortuneq pinngoraangat assersuutigalugu Asiami panernersuaqartitsisarpoq, tamannalu ukioq manna pisinnaanissaa aarlerinartortaqartoq nutaarsiassaqartitsiviup Reutersip allaaseraa.
El Niño spanskisut oqaasiuvoq isumaqarlunilu nukappiaraq naalungiaq. El Niño pinngoraangat Manerussuup kangisinnerusortaani imaq kissakkiartortarpoq, kiattullu sarfarsua taanna Amerika Kujalliup tungaanut ingerlaaraangat Nunarsuarmi silap pissusia allanngupiloorsinnaasarpoq.
/ritzau/
