Meeqqat qimagutitinneqartut naleqqussarluarsimalersut
- Oqarluaannaraanni massakkut ajunngittorujuupput. Amerlanerit qujanartumik anigorluarpaat. Meeqqat aamma taamaakkajunnerusaramik, inuunermut nutaamut naleqqussapallannerusaramik, Lars Fleischer oqarpoq.
Pissutsilli aallaqqaammut allaanerupput. Nunaqarfiit inui qimagutitinneqartut meerartaat Uummannap atuarfiani ataatsimoortillugit paarineqarput.
Meerarpassuillu sunnertisimaqisut, Lars Fleischerip maluginiarsimavaa.
- Aneeqatiginerani sissaq ullut siulliit orninnaveersaarnikuuaat. Tupinnanngitsumik. Immaqaluunniit mallilaartunnguaq tassaarsuarnissaa takorloortarlugu ornikkusunneq ajorpaat.
AAMMA ATUARUK Nuugaatsiarmiut Illorsuarmiullu meerartaat atuagaasivinnapput
AAMMA ATUARUK Inuussutissarsiornerput uninngavoq
Karrani tassaarsuaq: Maanna susoqarpa?
Juunip 17-ani ajunaarnersuaq nunatta oqaluttuarisaanerani annersaraat.
KNR tassaarsuarmit eqqugaasut oqaloqatigiartorlugit novembarip qaammataani Uummannamiitsivoq.
Pisut oqaluttuarineri KNR-imi ulluni aggersuni malinnaavigikkit.
Meeqqat inuusuttullu nunaqarfimmiit illoqarfimmut nuunnerat inuunerannik allannguerujussuarsimavoq.
- Nunaqarfinnguaminni kiffaanngissusilerujuullutik pisut maanga illoqarfimmut allarujussuarmut, naak Uummannaq mikigaluaqisoq, allarujussuusimassagami aamma. Taanna takorlornaartarpoq.
Lars Fleischer naapertorlugu meeqqat aallaqqaammut nipaassimaqaat, piffissarli ingerlatillugu misigissutsiminnik oqaasinnguisinnaanngoriartorput.
Uummannami isumaginninnermut pisortaq taamatuttaaq naliliivoq:
- Uani pisorpiaq eqqarsaatigalugu qisuariaateqartarput assigiinngitsunik, soorlu kamannerit, qiarujussuarnerit assigiinngitsutigut eqqissiveerunnerit sinissaarunnerillu. Tamakkua atuuttartut paasivarput, Nielsine Grønvold Petersen oqarpoq.
Meeqqat nunaqarfinnit qimagutitinneqartut 49-sut amerlanngitsunnguakkaarlutik tarnip pissusaanik ilisimasalimmit ikiorneqarlutik oqaloqatigiittarput. Iluaqutigisimagaallu, Nielsine Grønvold Petersen isumaqarpoq.
AAMMA ATUARUK Qaasuitsup Kommuniani sulisut uippakajaalersimasut
Meeqqat pissutsinut nutaanut naleqqussapallassimasut, Lars Fleischer isumaqarpoq.
Soorlu assersuutigalugu angerlarserlutik kingumut qiviaraangata maanna nuannersunngortittarpaat.
- Maqaasinerit takkukkaangata oqaluttuat nuannersunut saakkiartuaarujoorput. Ikioqatigiinneq immaqalu aneeqatigiittarneq maqaasiartuaarlugit oqaluttuat soorlu; tassaniittaraluarpugut, tassani arsartaraluarpugut, ilinniartitsisoq sunngiffimmilu sammisassaqartitsinermut pisortaq, Lars Fleischer, oqarpoq.
Meeqqat qimagutitinneqarnikut 49-it Uummannami Edvard Krusep atuarfiani atuarput.
