Efterskolertartut siunissartik pilersaarusiussavaat

Inuusuttut ilinniagassamik toqqarnissaannut, inuunerminnilu sammivissaminnik toqqaanissaminnut pitsaanerusumik ikiorneqartariaqaraluarput.

Kalaallit Illuutaat Danmarkimiittut taama isumaqarput, maannalu kalaallit inuusuttut Danmarkimi efterskolernerminni siunissamik eqqarsaatigilluarnissaat pillugu suliniuteqarniarlerput.

Angisuungoruvit sunngussavit?

Apeqqut taanna inuusuttorpassuit eqqarsaatigisarpaat. Kalaaliararpassuarnulli Danmarkimi efterskolertunut apeqqut taanna akissutissaqartinneqartanngilaq. Aasaanerani atuanngiffeqarnerup kingorna sunissartik ilisimasanngilaat.

Aarhusimi Kalaallit Illuutaanni ilinniartunut siunnersorti Anne Overgaard Clausenip inuusuttut ilinniagassaminnik toqqaasimanngitsut naammattoortarpai.

- Amerlapput oqartartut: efterskolereeruma ukioq ataaseq atuanngiffeqarniarpunga. Tamannali nuanninngilluinnarpoq, aningaasaateqarani susassaqaranilu.

- Inuusuttorpaalunnut unammillernartuuvoq efterskolernermik kinguninngua arlaanni aallartinngikkunik. Kisitsisit taaneqarsimapput 60 procent -it, efterskolereernermik kingorna arlaannik aallartitaqanngitsoortartut.

Efterskolenut ataasiakkaanut ikiuineq

Tamanna pillugu Kalaallit Illuutaat Danmarkimiittut inuusuttunut suliniuteqarnerunialerput.

Illuutit inuusuttut ingerlaqqinnissaminnik ilisimanittut ikiortarpaat- siunnersortilli inuusuttut siunissaminnik pilersaarusiorsimanngitsut aamma samminialerpaat.

- Neriuutigaarput efterskolit siusissukkut inuusuttunik oqaloqateqartarnissaat, efterskole qimakkunikku sumut ingerlariaqqinnissaat pillugit. Tamakkumi ulluinnarni inuusuttut qanittumik attaveqarfigaat, pikkoriffii piginnaasaallu ilisimallugit. Efterskoleni siunnersorneqarneq pisarmat "inuunera sumut atussavara" -mik qulequtalik, Anne Clausen oqarpoq.

Siunnersortinut ilitsersuut

Tamatumunnga piumasaqaataavoq Kalaallit Illuutaasa efterskoleni siunnersortit ikiortassangaat kalaallit inuusuttut siunnersornissaannut.

- Siunnersortit aamma Kalaallit Nunaanni pissutsit pillugit siunnersorneqarnissartik pisariaqartittarpaat. Periarfissat suuppat. Siunnersortit isumaqartaramik ilinniartut Danmarkimiikkunik ajunnginnerusoq. Tamannali eqqunngilaq. Inuusuttunut 16-17-nik ukiulinnut amerlasuutigut angajoqqaat tapersersuisinnaanerat ungasillugu nunami allamiinneq pitsaasuusanngilaq.

Kalaallit Illuutaasa maanna neriuutigaat suliniummut aningaasaliiffigineqassallutik. Folketingi qaammat una kalaallit Danmarkimiittut ilanngutitaanissaat siunertaralugu 4 millioner koruunit aningaasaliissutigaat.

Tamatuma saniatigut aamma aningaasaateqarfinnit assigiinngitsunit aamma aningaasaliiffigineqassallutik.