DTU-p issittumi ilisimatusarfittaaq sukatereqataaffigissagaa
Arctic DTU januaarip aallaqqaataani 2018 ammassaaq. Ilinniartitaanerup, ilisimasassarsiornerup, nutaaliornerup siunnersuisarnerullu iluini DTU-p Nunatsinni sammisaata siuarsarnissaat siunertaavoq.
Ilisimatusarfiup nutaap ammarneqarnerani maannakkut ilisimatusarfiusut marluusut Polar DTU aamma DTU Center for Arktisk Teknologi ataatsimoortinneqalissapput.
Siunissami silap pissusiata Kalaallit Nunaanni aamma Issittumi suliniutinut sakkussat annertusarnissaat pisariaqartilissagai, DTU-mi rektoriusoq isumaqarpoq.
- Ukiuni qulikkaani aggersuni inunnut inuuniarnermi atugassarititaasut silap pissusiisa allanngoriartornerisa ilungersunartumik allanngortissavaat. Nikerarneq malunnarsereerpoq, ukiunilu qulikkaani aggersuni manna tikillugu suli piaarnerusumik allanngorarnera sukkatsikkiartussaaq. Tamanna minnrunngitsumik issittuni atuutissaaq, tamaani sermersuit aakkiartortut sumiiffinni namminerni kisiaanni aamma nunarsuarmi unamminartunik malitseqassallutik. Issittumi pissutsit pillugut ilisimasanik ilisimatusarnermik tunngaveqartunik pisariaqartitsineq annertusiartorpoq, rektor Anders O. Bjarklev tusagassiuutinut nalunaarummini oqarpoq.
Arctic DTU pisortaqassaaq, allattoqarfeqarluni aammalu Lyngbymi DTU-mi aamma Sisimiuni Campusimi aallaaveqassalluni.