Dorisip sukumiinerusumik akineqarnissani kissaatigaa
- Camp Century-mik ingerlatsinermi ajutoortoqarsimanersoq ajutoortoqarsimannginnersorluunniit paaserusuppara.
Siumup folketingimi ilaasortaatitaa Doris Jakobsen taama oqarpoq. Camp Century sermersuup iluani 100 kilometerinik ilorpasitsigisumi illoqarfiuvoq, Amerikamiunit 1958-imi pilersinneqartoq. Atomip nukinganik nukissiuut misissuivimmut ukuni pingasuni nukimmik pilersuisuuvoq. Doris Jakobsen isumaqarpoq ministerip akissutaa, Nunatsinni nillertumik sorsunneq pillugu Danmarkimi nunanut allanut tunngasunut misissuiviup nalunaarusiaanit allaanerussuteqartoq.
- Danmarkimi naalakkersuisut iluamik nassuiaateqartariaqarput, saliisoqarsimanersoq imaluunniit ulorianartunik soqannginnersoq imaluunnit qanoq iliuuseqartoqarsimanersoq nassuaassutigalugit.
Doris Jakobsen taama oqarpoq. Taanna apeqqutinik arlalinnik nutaanik ministerimut apeqquteqaqqippoq, ilaatigut imeq minguttoq 178.000 liiteri annikinnerusumik qinngulanernik radioaktivitalik sermimut kuutsinneqarsimasoq pillugu paasisaqarusulluni.
- Avanersuarmiut peqqissusaasa qulakkeerneqarnissaat aamma Amerikamiu reaktorimi imermik taama annertutigisumik qinngulanernik radioaktiviusunik akulimmik sermersuarmut kuutsitsisarsimanerminni innarliisimanersut inarliisimannginnersulluunniit, qallunaat naalakkersuisuisa erseqqissumik oqaatigissagaat, naalakkersuisunut apeqquteqarninni anguniarpara.
Doris Jakobsen taama oqarpoq.
Camp Century tassaavoq Amerikamiut sermersuup iluani qaartartunut igeriuttakkanut inissiiviannut Iceworm-imik taagorneqartumut qularnanngitsumik taaguutigitinneqartoq. Amerikamiut naatsorsuutigisaanniit sermersuup sukkanerusumik nikikkiartortarnera pissutigalugu, suliniutigineqartoq 1966-imi taamaatiinnarneqarpoq.
