Doris Jakobsen Folketingimut iserpoq

Folketingimi sulileruit suna siullertut anguniassaviuk?

- Suleqatigiinnissamik isumaqatigiissummi Siumumit Socialdemokraatinillu atsiorneqartumi anguniakkatut piviusunngortinnissaat siullertut sulissutigissavara. Aappassaattut Eqqartuussiveqarnerup iluani sipaarniutissatut pilersaarutit unitsinniarnissaat sulissutigissavara. Pingajussaattut Lars-Emil Johansenip siunnersuutaa  kalaallit innuttaasut eqqartuussisulersuunneqarnerinut atatillugu kalaallisut oqaatsit siullertut inissisimasarnissaat sulissutigissavara.

Doris Jakobsenip Folketingimi sulileruni Kommuneqarfik Sermersuumi kommunalbestyrelsimut ilaasortaajunnaarnissani aalajangiusimavaa:

- Inatsisartuni sulininnit sulinngiffeqarallarnissara pilersaarutigaara, aamma piffissap ingerlanerani Inatsisartuni sulininnut uternissara naatsorsuutiga, isumaqarama Folketingimi Inatsisartunilu sulineq nukittoqutitaqartoq, Folketingimi ilaasortanngorlaaq oqarpoq.

Doris Jakobsen 24-nik ukioqarluni Inatsisartunut 2002-mi qinigaavoq 2005-imilu Nuummi Kommunalbestyrelsimut ilaasortanngorluni.

Inatsisartuni sulinermi nalaani aamma Kultureqarnermut, Ilinniartitaanermut, Ilisimatusarnermut Ilageeqarnermullu naalakkersuisutut piffissami sivikitsumi atorfeqarpoq.

2009-mi Inatsisartunut qinersinermi Doris Jakobsen qinigaasunut ilaaqqippoq ukiallu ingerlanerani Folketingimi Lars-Emil Johansenip paarlattaatut qaammatini marlunni sulilluni.

Doris Jakobsen aappanilu Ejvind Jensen tamarmik marlunnik meeraqarput.