Doris Facebookimi: IA-mik qinersinerup Dansk Folkepartimik qinersineq assigiinnarpaa
Talerperlernilli tapersersuigaanni tamanna qanoq paasisariaqarnersoq erseqqissaannarini, Doris Jakobsenip oqaatigaa.
Doris Jakobsen taama nalunaaruteqarpoq, IA-p siulittaasuata Sara Olsvigip oqaatigeeraalu, IA folketingimi ilaasortaatitaqaqqilissappat, saamerliit ilaatigut Pituffimmut tunngatillugu nassueruteqanngikkunik IA-mit toqqarneqarnissartik qulakkeersinnaanngikkaat.
Soorlu aamma IA ministeriuninngortussamik tapersersuilinnginnerminni piumasaqaateqaqqaarniarput - tassa talerperliunersut saamerliunersulluunniit apeqqutaatinnagit.
Doris Jakobsenilli, Folketingimut qinigassanngorteqqinngitsup aalajangiusimavaa oqarluni, IA talerperlernik tapersersuiniaruni, Dansk Folkepartimik toqqaannanngikkaluamik tapersersuissasoq tamannalu Nunatsinnut ajoqutaasinnaasoq.
- Ingammik eqqarsaatigissagaanni Dansk Folkepartimeersut ukiuni kingullerni qanoq Nunatsinnut aamma inuiaqatigiinnut nakkarsaanikuutigisut aamma qanoq nunasiaatilittut ukiuni kingullerni sisamani pissusilersortut. Tamakku eqqaaginnassagaanniluunniit isumaqarpunga ajoqusiinerussasoq taamatut talerperlernik suleqateqarneq, minnnerunngitsumik Dansk Folkepartikkut akuutillugit. Nalunnginnatsigumi Dansk Fokepartikkut namminersulernitsinnut akerliusuusut.
Doris Jakobsen taama oqarpoq.
Ersisaarutaava imaluunniit paasissutissiinerua?
IA-mulli qinersinerup Dansk Folkepartimik qinersinerup assigiinnartussaaneranik oqarneq Doris Jakobsenimit ersisaarutaannaasoq, IA-p folketingimut qinigassanngortitaa Johan Lund Olsen isumaqarpoq.
Taassuma erseqqissarpaa, IA partiinit allanit naalakkersorneqanngimmat, akerlianilli Siumut Socialdemokratinit sarliarneqartut taamaattumillu arlalinnut tunngatillugu namminneerlutik aalajangiisinnaasarsimanngitsut.
Lars Løkke Rasmussenip anguniagai imaluunniit Helle Thorning-Schmidtip anguniagai IA-p sorsuutigissanngikkai - Nunarpulli sorsuutigissagaa, Johan Lund Olsenip tusagassiuutinut nalunaarummini erseqqissarpaa.
Aamma atuaruk Naalagaaffeqatigiinnermut Issittumullu ministereqalernissaa IA-p piumasarigaa
Doris Jakobsenip piumasaqaateqartoqarnissaa isumaqatigaa, aamma saamerlernik suleqateqassagaluaraanniluunniit:
- Isumaqarpunga saamerlernik suleqateqarniaraluaraanniluunniit aamma isumaqatigiinniartoqarsinnaasoq piumasaqaatinillu assigiinngitsunik saqqummiisoqarsinnaasoq.
Doris Jakobsen taama oqarpoq.
IA-p siulittaasuata Sara Olsvigip erseqqissarpaa, IA saamerliuniartuummat.
- Danmarkimi partiinut aalajangersimasunut pituttoreernissarput kissaatiginagu erseqqissumik oqaatigereerparput. Isumaqatigiinniarnissani nukittuumik inissisimanissarput kissaatigaarput. Imaanngilaq ilaasortaatitassarput talerperlernut tunereeripput, Sara Olsvig naggasiivoq.
