Disko Line aaqqiagiinngissutaasoq
- Isumaqarpunga ajorluinnartoq. Kiffartuussinissamummi isumaqatigiissuteqassallutik septembari qiteqquttorli ilisimasimavaat, KANUKOKA-p siulittaasua Simon Simonsen KNR-imut oqarpoq.
Disko Linep piginnittuata Jørgen Nielsenip oqaatigereerpaa, Namminersorlutik Oqartussat neriorsuutaat naapertorlugu kiffartuussinissamik isumaqatigiissutit juulip aallaqqaataanili piareerneqassasut. Taakkuli septembari qiteqqummat aatsaat atsiorneqarput saqqummiunneqarlutillu.
AAMMA ATUARUK Disko Linep inissilluarnissaanut periarfissinneqarli
Disko Linelu taamaammat sulisussarsiornissamut atortussanillu pisiortornissamut piffissakinnerusimavoq. Taavalu aamma ilaasut pisinnaatitaaffii pillugit isumaqatigiissutit decembarip 30-ani suliaralugit naammassineqarput - Disko Linep Qeqertarsuup Tunuani Kujataanilu kiffartuussisussanngorneranut ullut marluinnanngortut.
Kiffartuussinissamut isumaqatigiissut aallartinnerliortoq, Disko Linemi piginnittup nassuerutigereerpaa, oqaatigalugulu aaqqiissuteqarniarlutik.
Simon Simonsenilli tamanna saammarsaatiginngilaa, isumaqarami ingerlatsivik piareersarluarsimanngitsoq.
KANUKOKA-mili siulittaasuusimasup, Qaasuitsup Kommuniani kommunalbestyrelsimut maanna ilaasortap, Palle Jerimiassenip, siulittaasoq isumaqatiginngilaa.
AAMMA ATUARUK Disko Line iluarsiissuteqassalluni neriorsuisoq
- Disko Line piumassuseqarluni sapiissuseqarlunilu suliassaq imaannaanngitsoq suliariniarlugu imminut neqeroorutigivoq, Palle Jerimiassen KNR-imut allappoq.
Sinersortaammut ilaasussanut utaqqisarfeqannginnera Simon Simonsenip aamma isornartorsiutigaa. Tassungalu Palle Jerimiassen ima akissuteqarpoq:
- Piviusoq aamma unaavoq, sinersortaatinik nunarput tamaat angalasoqarallarmat angalasut aallaleraagata illuaqqanik utaqqisarfeqanngisaannarnikuupput, massakkullu angallassisussamut nutaamut aamma tamakkua tutsinniarneqarnerat pissusissamisuunngilaq, Palle Jerimiassen allappoq.
