Innarluutillit sapaatit akunneranni skizofrenii sammineqassaaq
Tarnikkut innarluutit qulequtaritinneqassasoq, Ilaqutariinnermut, Naligiissitaanermut Isumaginninnermullu Naalakkersuisup Martha Lund Olsenip nalunaarutigaa, nappaallu skizofreni tassani immikkut isiginiarneqassalluni.
Skizofreni tarnikkut sakkortuumik anniaataavoq, eqqarsartaatsimik, misigissutsinik, malugisaatinillu sunniisartoq. Skizofreni atoraanni piviusuunngitsut piviusullu akuleriissinneqarsinnaasarput. Immaqa eqqumalluni sinnattupiluttarnertut assersuunneqarsinnaalluni.
Ilaqutariinnermut, Naligiissitaanermut Isumaginninnermullu Naalakkersuisoqarfik taama allaaserisaqarpoq.
Aamma atuaruk Innarluutilinnut sapaatip-akunnerani angajoqqaajusut qitiutinneqassapput
Naak innuttaasut 3 procentii tikillugit inuunermi ilaanni tarnimikkut perulunnermik eqqorneqarnissaat naatsorsuutigineqaraluartoq, tarnikkut anniaatit qanoq pinngortarnersut annerusumik ilisimaneqanngilaq, tarnikkut anniaatit inunnguuserineqarsinnaapput, tassanngaannartumilluunniit aamma takkussinnaasarlutik.
Kingornussinikkut atukkat, sananeqaatitigullu sunniutit, soorlu aanngajaarniutinik atuineq, tassanngaannartumik imaluunniit tarnikkut sivisuumik artorsarneq imaluunniit taakkua akuleriissikkaanni tarnikkut anniaateqalernermik kinguneqarsinnaavoq.
Skizofrenimilli eqqorneqarsimasut katsorsarneqartariaqartarput, nakkorsaatinik oqaloqatiginninnikkullu katsorsaasoqartarluni.
Inuit skizofrenimik eqqorneqarsimasut timiminnik atuisinnaanerat appariangaatsiarsinnaasarpoq, innarluutillillu pillugit inatsisiliorneq naapertorlugu ikiorneqartariaqarsinnaallutik.