Demokraatit: Ukiukitsunut hasheerniartut sakkortunerusumik pillarneqartalerlik
- Demokraatini nuannaarutigaarput Naalakkersuisut tapersersormatigut oqaratta ikiaroornartumik hashimik tuniniaasartut inunnut 18-it inorlugit ukiulinnut tuniniaasut sakkortunerusumik pineqartalertariaqartut, Demokraatit sinnerlugit Inatsisartunut ilaasortaq Tillie Martinussen, naalakkersuisut akissuteqaataanut taama ilaatigut oqarpoq.
Martinussen, naalakkersuisunut paragraf 37 naapertorlugu apeqquteqaateqarpoq ikiaroornartunik 18-it inorlugit ukiulinnut tuniniaasartut sakkortunerusumik pillarneqartarnissaat sulissutiginiarneraat, Naalakkersuisullu isumaqataapput.
Aamma atuaruk Ikiaroornartunik eqqussisoq pineqaatissinneqartoq
- Kalaallit Nunaanni meeqqat 5000-it missaat ajornartorsiorput. Meeqqat tamakku aanngajaarniutinut ulorianartorsiortinneqassanngillat pisisartunngortillugit ikiaroornartuernianit. Uagut politikeritut pisussaaffigaarput suut tamaasa atorlugit meeqqanik illersuinissarput ulorianartorsiornerpaatillutik atornerluisunngoqqunagit, Tillie Martinussen, Demokraatineersoq, oqarpoq.
Taassuma paaserusuppaa inatsimmi maanna atuuttumi periarfissaqarnersoq ikiaroornartuerniat assersuutigalugu 18-it inorlugit ukiulinnut tuniniaasimasut sakkortunerusumik pillarneqartalersinnaanersut.