NUUMMIIT NUUNNEQ Demokraatit: Siumup borgmesteriutitai pingasut akisussaassuseqanngitsuliorput

- Pisortat allaffissornerat nukittorsarniaraanni pisariillisarlugulu, taava nunap sinneranut tamarmut allaffissorneq siammarterneqassanngilaq, Demokraatiti Sermersuup kitaani immikkoortortaani siulittaasutut qinigaarlaaq oqarpoq.

Nuummit suliffeqarfinnik nussuinikkut pisariillisaanissaq ajornarsivissaaq, tamannalu akileraartartunut akisuupilussuussaaq. Aningaasartuutissaagaluit nuna aningaasarliortup ilorraap tungaanut saatsinnissaanut atoraanni pitsaaneruvoq.

-  Sulisummi ataatsip nuunnerinnaa 1 million koruuninik akeqariaannaavoq. Assersuutigalugu tamanna Norgemi misilittagaqarfigineqarpoq. Naak Norgemi angallannikkut periarfissat, Kalaallit Nunaanni angallannikkut pissutsinut naleqqiullugit pitsaanerungaaraluartut, Rasmus Dalsgaard Andersen erseqqissaavoq.

Aamma atuaruk Borgmesterit: Atorfiit Nuummiit nuussornerisa Nunarput naligiinerulersissavaa

Aamma apeqqutaavoq sulisut atorfigisatik nuunneqarpata malinnaarusunnissaat naatsorsuutigineqarsinnaanersoq.

- Taamaanngippat sulisunik ilinniarsimasunik pissarsiniarnissaq imaannaanngitsuusinnaavoq, nangipporlu:

- Suliaq saqqummiunneqartoq nalunaarusiatut taaneqarmat eqqumiigaarput. Inuiaqatigiinnut kingunissai aningaasatigut naatsorsorneqarnikuunngillat. Nangiinnarneqarpoq Kommuneqarfik Sermersuumit aningaasanik piumasaqarneq paasissutissanik tutsuiginartunik saqqummiussaqanngivilluni.

Allatut oqaatigalugu, aningaasanik amigaateqaleraanni Kommuneqarfik Sermersuumut aallertarneq assigiinnarpaa, Rasmus Dalsgaard Andersen allappoq.

Neriuppugut nuna tamakkerlugu politikerit tamakkiisoq isigalugu oqallinnermi paasissutissanik pitsaasunik qalluisoqarnissaa piumasariumaaraat, nunatta aningaasaqarneranut ajoqutaalluinnarsinnaasumik aalajangiitinnatik.

Aamma atuaruk Suliffiit 600-t nuunneqarnissaannik siunnersuut