Demokraatit partiini annersanngorpoq

Demokraatit siuaraluttuinnartutut nalilerneqarput. Inuit septembarip naanerani HS Analysemit apersorneqarneranni akipput ulluni makkunani inatsisartunut qinersineqaraluarpat demokraatit qinerneqarnerpaajussagaluartut.

Qinersisartut pingasuugaangata taakkunannga ataatsip demokraatit qinissagaluarpai, aamma tamanna isumaqarpoq Demokraatit partiit allat tamaasa qaangissagaat 30%-it qinersisoralugit, 2002-mut naleqqillugu 13%-mik siuariarlutik.

Siumut 27%-iniit toqqarneqassagluarpoq 2002-mut naleqqiullugu 2%-it annaallugit. Inuit Ataqatigiit 25%-innassagaluarput 3%-erluinnaat annaallugit. Atassut aamma kinguariassagaluarpoq 5%-ingajammik kinguariarlutik 16%-iinnarnit qinerneqassagaluaramik. Kattusseqatigiit aamma kinguarialaarlutik 5%-it ataatilaarsimassagaluarpaat.

Allatut oqaatigalugit inatsisartuni 31-nik ilaasortalimmi Demokraatit qulingiluanngussagaluarput, maannakkornit sisamanik ilallutik.

Siumukkormiut suli qulingiluaassagaluarput ataatsimik ilanngarlutik, aamma Inuit Ataqatigiit ataatsimik ilanngarlutik arfineq-marlunngussagaluarlutik kiisalu Atassut arfineq-marlunnit tallimaannanngorsimassagaluarlutik. Kattusseqatigiit suli ataatsimik inatsisartuniititaqassagaluarput.

Taamalu maanna naalakkersuisooqatigiit Siumut Inuit Ataqatigiillu amerlanerussutaaruteratarsinnaapput, maanna katillutik 16-iinnaallutik illuatungiliuttut 15-iulersinnaagaluarmata. Demokraatilli Inuit Ataqatigiillu ataatsimoorniarunik aamma 16-inngorsinnaaluaraluarput.

HS Analysep Sermitsiaq sulissussimavaa, Sermitsiarlu aqagu saqqummerpat inuit 659-it apersorneqarsimanerat atuarneqarsinnaavoq.