Demokraatit: Palasit imminut toquttarnerup pinaveersaartinneranut suleqataasinnaapput
Imminut toquttarnerup imminullu toqunnissamut eqqarsaateqartarnerup pinaveersaartinnissaanut atatillugu Nunatsinni palaseqarfiit suleqataanissaat periarfissaasoq, Tillie Martinussen isumaqarpoq, palaseqarfiillu imminut toquttarnerup pinaveersaartinniarneqarnerani atorneqarsinnaanersut Naalakkersuisunut apeqquteqaatigalugu.
- Ilagiit nunami maani innuttaasunit ataqqineqartupilussuupput, taamaattumik pissusissamisoorpoq apeqqutigissallugu, ilagiinni sulisut ilisinermut allanullu atatillugu tarnikkut kiffartuussinermut misilittagaqarluartut ikiuuttarallarsinnaannginnersut, Tillie Martinussen ilaatigut taama allappoq.
Palaseqarfiit oqarasuaatikkut ulloq unnuarlu siunnersuisarnermut ikiuuttarallarsinnaannginnersut taassuma aamma apeqqutigaa.
Imminut toqunnissamut eqqarsaateqaraanni tamanna pinaveersaartinniarlugu akeqanngitsumik siunnersuisoqarsinnaavoq, Attavik 146 sianerfigalugu siunnersorneqarsinnaalluni.