Demokraatit: Naalakkersuisooqataasutut pisussaaffik pingaarneruvoq
Naalakkersuisooqataasut Demokraatit allannguutissamut siunnersuut siunertaminut naapertuutinngitsoq naqissuserpaa.
Naalakkersuisooqataasutulli pisussaaffik pingaarnerummat, aamma taakkua akuersipput.
- Naalakkersuisooqatigiinneq angusaqarfiusarlunilu aamma tunniussaqarfiusarpoq. Pineqartoq massakkut isumaqataaffiginngilarput tunniutiinnartariaqarlutali. Suleqatigiinneq tassa taamaappoq, Demokraatit politikkikkut oqaaseqartartuat Michael N. Rosing oqarpoq.
Aamma atuaruk Krusep aalisartut amerlanerunissaat kissaatigaa
Demokraatit taamaasillutik naqissuseqarpaat Naalakkersuisooqatigiinni ikinnerussuteqarluni akisusinnaasartoq.
Demokraatit Inatsisartut oqaluttarfiannit inatsimmut allannguutissatut siunnersuut isumaqatiginnginnerariarlugu, akuersissallutik oqaaseqarnerat, Inuit Ataqatigiit aalassassutigaat.
Tamanna Naalakkersuisoqatinit tatineqarnermut ersiutaaasutut, Inuit Ataqatigiit isigaa. Demokraatilli taamannginnerarpaat.
- Isumaqataanngissinnaavugut aamma isumaqataanata oqarsinnaavugut. Akerliusumilli taasigaanni tamanna Naalakkersuisooqataarusunnginnermik oqarneruvoq. Uagullu Naalakkersuisooqataaginnarusuppugut.
Aamma atuaruk GE ernumavoq: Angallatitaarnissamut tapiiginnartoqartalissaaq
Naqissuserpaalu Naalakkersuisooqataaneq aamma akeqartoq.
- Ilaannikkut annernarsinnaasarpoq. Akuersaanngisat akuerisariaqartarmata. Kisiannili tamanna avaqqunneqarsinnaasanngilaq. Sunneeqataasinnaaneq suleqataannginnerminngaanniit pitsaaneruvoq, Demokraatit politikkikkut oqaaseqartartuat Michael N. Rosing oqarpoq.
