Politikki Inuussutissarsiutit

KANGILINNGUIT Demokraatit: Kangilinnguit nunatta karsianut aningaasartuutaassanngilaq

Kangilinnguani illuutit isaternagit tunineqarnissaat Demokraatit orniginartippaat, tamannali nunatta karsianut sunnguamilluunniit aningaasartuutaassanngitsoq piumasaqaatigalugu. Partiilli avatangiisit pillugit oqaaseqartartuata suliariumannittussarsiuussinerup aallaqqaataaneerneqarnissaa ilungersuutigerusunngilaa.

Allattoq Helle Nørrelund Sørensen

decembarip 10-at 2015 11:35

Nutserisoq Simon Uldum -

Illersornissaqarfiup Kangilinnguani illuutai siunertanut nutaanut atorneqarnissaat tulluartuussaaq, Demokraatit avatangiisit pillugit oqaaseqartartuat Michael Rosing taama isumaqarpoq.

- Tunngaviatigut taamaaliortoqarsinnaavoq. Tunngaviatigulli saliisoqarnissaa soqutigineruarput, KNR-imut taama oqarpoq.

Rosing taamaalilluni Folketingimut ilaasortat marluusut Illersornissaqarfiup maanna suliariumannittussarsiuussinerata allanngortinneqarnissaanik kajumissaarinerat taperserpaa. Ssuliariumannittussarsiuussinermi avatangiisinik saliinissaq illuutinillu isaterinissaq pineqarpoq.

Aamma atuaruk Suliariumannittussarsiuussineq ingerlatiinnarneqarniarpasippoq

Ersarissumik pilersaarusiuunneqartariaqartoq
Hammondip (S) Chemnitz Larsenillu (IA) avatangiisinik saliinissap Illersornissaqarfimmit isumagineqarnissaa kissaatigineruaat illuutillu isaternagit periarfissanik allanik misissuisoqarnissaa kissaatigalugu.

Illuutilli tunineqassappata pisisussaq erseqqilluinnartumik pilersaaruteqartariaqartoq, Michael Rosing taama isumaqarpoq.

- Siullertut, tatiginartumik pilersaaruteqartariaqarput. Namminersorlutik Oqartussanut aningaasartuutaaleriasaannginnissaa qulakkeerlugu uppernarsartariaqarpaat.

Aamma pisisut Kangilinnguit, assersuutigalugu Qullissatut, inuerussimasutut qimannginnissaa qulakkeertariaqarpaat.

- Illut atunngitsuussagunikkit saliinissaq isumagisinnaassallugu aamma uppernarsartariaqarpaat, Michael Rosing taama oqarpoq.

Illersornissaqarfiup suliariumannittussarsiuussinera naapertorlugu, saliinissaq isaterinissarlu pillugu suliffeqarfimmut 2016-ip aallartinnerani isumaqatigiissuteqartoqassaaq.

Aamma atuaruk Suliariumannittussarsiuussinissamut Kalaallit Nunaat aalajangiissaaq

Suliariumannittussarsiuussinerup allanngortinneqarnissaa kimigiiserutiginianngikkaa
Illersornissaqarfiup suliariumannittussarsiuussineq maanna ingerlanneqartup allanngortinneqarnissaa Demokraatit taperserpaat, Michael Rosingilli ilungersuutiginianngilaa.

- Uanga nammineq pingaartillugu sulissutigerusutattut oqaatigisinnaanngilara. Isumassarsiatsialaanerali allanit tunngavilersorluarneqarsinnaassappat soorunami tapersiiumaarpunga.

Demokraatit naalakkersuisooqataata, pinngortitamut, avatangiisinut inatsisinillu atuutitsinermut naalakkersuisup Mala Høy Kúkop siornatigut KNR-imut oqaatigereerpaa Kangilinnguani saliinissaq Illersornissaqarfiup akisussaaffigigaa.

Illuutit isaterneqartussaajunnaarsillugit suliarimannittussarsiuussinerup allanngortinneqarnissaanik kissaateqarnermik tapersersuinersoq aperisinnaasimanngilarput.