Demokraatit ingerlatsiviit akileraarutaat apparniarpaat
Nunatta aalisarneq aningaasanik isaatitsissutiginerusariaqarpaa, tamanna qineqqusaarnermi oqallisaasut annerit ilagaat. Aalisagaq akikinaarlugu avammut tunineqartartoq Siumut isumaqarpoq, tamannalu Demokraatit isumaqatigaat.
- Nunatsinni suliffeqarfimmik ingerlatsinissaq pilerinarsarusupparput. Tamanna pissooq akileraarutitigut apparsaanikkut, nilikilliliisinnaanermillu pitsanngorsaanikkut, Demokraatit siulittaasuat oqarpoq, nangillunilu:
- Tassa aningaasat Nunatsinniiginnarnisai pitsanngorsarusupparput. Makku aningaasat aalisarnermiik isertissinnaasaraluagut Nunatsinniit asuli aniatiinnarnagit, Anda Uldum Radio KNR-imut oqarpoq.
Avaleraasartuut akikitsut
Taasuma aalisarneq pillugu oqallinneq piviusorsiunngitsutut isigaa, taamaattorli aalisakkat massakkumit isaatitsissutiginerusinnaagigut upperaa.
Anda Uldumip avaleraasartuut tikkuarpai, isumaqarami avaleraasartuut Islandimut sanilliullugu akikinaarujussuarlugit Nunatta tunisassiarigai naak sumiiffimmi assigiimmi aalisarneqaraluartut.
Ataatsimut isigalugu Demokraatit isumaqarput Nunarput qiviartariaqaripput, paasiniarlugulu qanoq suliffeqarfiit Nunatsinni aalartitsinissaannik pilerinarsaasoqarsinnaanersoq.
- Paasinarpoq nunani allani piginneqatigiiffiliorluni pilerinarnerusoq, tassani akileraarutitigut iluanaarutissat annertunerummata. Taamaammat akileraartarnikkut ingerlatsivinnut assigiinngitsunut atugassarititaasussat pitsinngorsarusuppagut. Taavalu aamma nalikilliliinissamut periarfissat pitsanngorsarlugit, Anda Uldum taama oqarpoq.