Demokraatit: Iluareqqusaarneruvoq
Taama sakkortutigisumik isornartorsiuilluni oqarpoq, Demokraatit siulittaasuata tullia, Inatsisartunut ilaasortaq, Randi Vestergaard Evaldsen.
- Aalisarnermut Naalakkersuisup biologit innersuussutaat malinnagit saarullittassat marloriaammik amerlimmagit tamanna sianiilliornertut isigisariaqarpoq, allaannginnamiluunniit nammineq qinersisartuminut iluareqqusaarluni taamaaliortoq. Randi Vestergaard Evaldsen taama oqarpoq, Demokraatit Inuusuttaasa tamannarpiaq pillugu Aalisarnermut Naalakkersuisoq ippassaq isornartorsioreeraallu.
Demokraatit Inuusuttaat isornartorsiuinerminni allapput, Naalakkersuisooqatigiinneq pillugu atsioqatigiinnermi allassimasoq, tassa nungusaataanngitsumik aalisarneq ingerlanneqassasoq aamma tassani allassimasoq alla taallugu, tassa biologit aalisartullu ilisimasaat naapertorlugit pisassanik agguaassisoqartarnissaanik isumaqatigiissut, Aalisarnermut Naalakkersuisumit unioqqutinneqartoq.
Aamma atuaruk Partiip inuusuttai: Kinguaassagut Krusep eqqarsaatiginngilai
Tamannalu Randi Vestergaard Evaldsenip aamma isumaqatigaa oqarlunili Naalakkersuisooqatigiinneq ulorianartorsiortinneqanngitsoq.
- Naalakkersuisooqatigiinneq ulorianartorsiortinneqanngilaq kisianni siunissaq ungasinnerusoq isigalugu suleriaatsit allanngortinneqartariaqalerput, soorlu Naalakkersuisooqatigiit suleqatigiinnerat nukittorsarlugu ilaatigut Naalakkersuisut ataatsimiititaliallu suleqatigiinnerminni immunut paaseqatigiinnerunissaat anguniarneqarluni. Demokraatit politikkikkut oqaaseqartartuat, Randi Vestergaard Evaldsen oqarpoq.
Naalakkersuisooqatigiit soorunami isornartorsiusinnaatitaapput, kisianni nungusaataanngitsumik suliffissaqartitsiniarnerlu eqqarsaatigalugit aamma Naalakkersuisooqatigiit isumaqatigiissutaat malillugu, saarullittassanik ukioq manna amerliliivunga, taama oqarpoq Aalisarnermut Naalakkersuisoq, Karl-Kristian Kruse.
Aamma atuaruk Steen Lynge: Saarullittassanik qaffaaneq siunissami ajornartorsiutinik annertunernik pilersitsiinnassaaq
- Naalakkersuisooqatigiinnemi isumaqatigiissummik malinninngitsutut taaneqarnera isumaqarpunga eqqortuunngitsoq. Tassami isumaqatigiissummi ersarissumik allassimavoq, ilisimatuussutsikkut ilisimasat aalaavigalugit aamma Nunatsinni atuisut, tassa aalisartut, ilisimasaat aallaavigalugit Naalakkersuisut pisassiisarnerminni tamanna toqqammavigisassagaat allassimalluni. Aalisarnermut Naalakkersuisoq, Karl-Kristian Kruse oqarpoq imalu nangilluni.
- Tassami aalisartunut aamma suliffissaqartitsinermut kiisalu Nunatta avammut niuerneranut pisasseeqqinnera iluaqutigineqartussaassaaq. Tassami tupinnassaqaaq iluaqutiginiarlugit naalakkersuinikkut qanoq iliuuseqartoqassanngippat. Tassami saarullit Nunatsinnuit takkunneri tamanna inuiaqatigiinnit pitsaasumik iluaqutigineqartariaqarmnata pisassanik qaffaanerit pinikuupput. Aalisarnermut, Piniarnermut Nunalerinermullu Naalakkersuisoq, Karl-Kristian Kruse oqarpoq.
