Ikiueqqaarnissap tungaatigut atuarfiup suliniuteqarnissaa partiimit kissaatigineqarpoq, Norge-milu misilittakkat innersuussutigineqarlutik. Norge-mi meeqqat atuarfiini ikiueqqaarneq ukioq 1939-mili atuartitsissutigineqartarpoq. 6. klassit atuartinneqartarneranni ikiueqqaarnerup immikkut atuartitsissutigineqarnissaa demokraatinit siunnersuutigineqarpoq.
Meeqqat atuarfiini ikiueqqaarneq atuartitsissutigineqartarpat ungasinnerusoq eqqarsaatigalugu meeqqat atuarfiat inuunermik annaassisinnaanermut suleqataassaaq.
Innuttaasut ilaat uummamminik unittoortoq naammattorneqarpat, inuit qaninnerpaami ittut uummarsaanissamut pisinnaasaqarunik inuunermik annaassisinnaapput, Palle Christiansen Demokraatit siulittaasuata tullia oqarpoq.