2017-imu aningaasanut inatsit Demokraatit: Amigartoorutit qanoq matussuserneqassappat?
Aningaasanut inatsisissatut siunnersuutip pingajussaaneerneqarnerani Demokraatit Inatsisartuni partiinut tamanut akerliupput. Naalakkersuisunit nutaanit suliniutaasunit aningaasalerneqanngitsunit amigartoorutissat matussuserneqarnissaannik partiit naalakkersuisuutitaqartut qanoq takorluugaqarnersut Demokraatit paaserusuppaat.
Tamanna isumaqatiginninniutigineqassasoq Siumumeersup Jens Immanuelsenip isumalluartup oqaatigaa.
Sinerissami akileraarutit assigiinnginneri Jens Immanueslenip tikkuarpaa, tamannalu tulluartuunersoq apeqquserlugu. Kommuneqarfik Sermersuumi innuttaasut Qaasuitsup Kommuniani Kommune Kujallermilu innuttaasunit procentpointinik marlunnik appasinnerusumik akileraartartut Jens Immanuelsenip eqqaasitsissutigaa.
Namminersulivinnissaq oqallinnermi aamma sammineqarpoq.
Amigartooruteqarnissap saniatigut Nunatsinni tunngaviusumik inatsiseqalernissamut siunnersuusiortussamik isumalioqatigiissitamik pilersitsinemut Naalakkersuisut 11 millionit koruuninik immikkoortitsiniarput. Taanna amigartooruteqarniarnerlu eqqarsaatigalugit ataqatigiinngitsoqartoq Randi Vestergaard Evaldsen isumaqarpoq.
Inuit Ataqatigiinneersullu Peter Olsenip namminersulivinnissamut aningaasaliineq qaammammut angalanermut assersuuppaa.
Avataarsualiartaatip nunarsuarmit aallassappat ikumatissarujussuarmut akiliisoqassaat. Avataarsualiartaatilli nunarsuaq qimareerpagu ikummatissaq annikinnerusoq atorneqalissaaq qaammammukarnissarlu sapernannginnerulissalluni, Peter Olsen oqaluttarfimmit oqarpoq.
Tassa namminersulivinnissaq aallaqqaammut unammillernarlunilu akisussasoq tamatumali kingorna ajornannginnerulissasoq Peter Olsen isumaqarpoq.
Nunatta nunanut allanut isumaqatigiissutaannit isertitaqarnerusinnaalissasoq Jens Immanuelsenip innersuussutigaa, USA-miullu Pituffiummiinnerat isertitaqarfiunerusinnaasoq assersuutigalugu.
Aningaasanut inatsit missingersuutinut inatsimmut, aamma ataasinngornermi akuersissutigineqartumut, unioqqutitsisoq Siumup sooq akuerisimaneraa Demokraatit aamma apeqqutigaat.
Amigartoorutinut matussusiissutissat siunissami isumaqatiginninniutigineqarumaartut, Jens Immanuelsenip oqaatigaa. Aningaasaqarnermut akileraartarnermullu ataatsimiititaliaq amigartoorutinut ernumassuteqarluni allappoq. Jens Immanuelsinilu ataatsimiititaliami siulittaasuuvoq.
Aningaasaqarnikkut imminut napatittumik ingerlajartuaarnissaq kinguartinneqariartuaarpasittoq aningaasaqarnermut akileraartarnermullu ataatsimiititaliap aningaasanut inatsisissatut siunnersuutip pingajussaarneqarnissaanut isumaliutitsissutimini allaaseraa.
Amigartoorutillu 2020-p tungaanut 100 millionit koruuningajannut qaffakkiartuaarsinnaammata, suliniutit aningaasalerneqanngitsut ukiuni tulliuttuni aningaasanut inatsisinut isumaqatiginninniarnernut unamillertitsisinnaasut ataatsimiititaliaq aamma allappoq.
Aningaasaqanermut naalakkersuisoq, Aqqaluaq B. Egede ataatsimiititaliamut eqqisssisaavoq, ilaatigut oqarluni, amigartoorutissat ukiut sisamat ingerlanerini ukiumut 40 millionit koruuniusussat, aningaasanut missingersuutigineqartunut 6,7 milliardinut naleqqiullugit amerlanngitsut.
Tamatuma saniatigut Nunatta karsia 1 milliard koruuninik tigoriaannarnik aningaasaateqartoq, naalakkersuisup akissutimini allaaseraa.
Aqqaluaq B. Egedelli isornartorsiuutit tusaatissatut tiguai. Missingersuutinullu inatsit akuersissutigineqarpat, Naalakkersuisut siunissaq ungasinnerusoq eqqarsaatigalugu missingersuusiortariaqartassasut allappoq. Tamannalu tassa maannakkut iluatsissimanngilaq.
