Demokraatini suleqatigiinnermik ajornartorsiut avissaartuutsitsisoq

Inatsisartut gruppianni suleqatigiinniarnermik ajornartorsiuteqarneq Michael Rosingilu oqaaseqarsinnaasinnaatitaajunnaartoq taamatullu Inatsisartut ataatsimiititaliaani atuuffimminik annaasaqartoq, Randi Vestergaard Evaldsenip KNR-imut uppernarsarpai.

Aalajangiineq partiit siulittaasuanit Inatsisartunilu ilaasortanit pingasunit, Randi Vestergaard Evaldsenimit, Nivi Olsenimit, Justus Hansenimillu aalajangerneqarpoq.

Rosing suli Demokraatiniittoq

Demokraatit siulittaasuata Randi Vestergaard Evaldsenip suna suleqatigiinniarnermik ajornartorsiuteqartitsinersoq oqaatigerusunngikkallarpaa, qanorlu pisoqarumaarnera paasinarsiumaartoq oqaatigalugu.

Michael Rosing pisoq pillugu oqaaseqarumanngikkallarpoq, Randi Vestergaard Evaldsenilli Michael Rosing Demokraatit gruppianni suli ilaanerarpaa pisorlu suli sulissutigineqarnerarlugu.