Demokraatineersoq Nivi Olsenip tusagassiuutit pillugit saqqummiussaa pillugu: Sianiitsuliornerulluinnarpoq
Tillie Martinussenip Nivi Olsenip siunnersuutaa isumaqatiginagu Atuagagdliutini ullumi saqqummersuni nangaassuteqarani ima oqaaseqarfigaa:
- Tusagassiuutit pioreersut taamatut arsaartuiffigineqarnerat sianiitsuliornerulluinnarpoq, Demokraatit sinnerlugit Inatsisartunut ilaasortaq aviisimut taama oqarpoq.
AAMMA ATUARUK Tusagassiuutit imminnut nakkutiginerulernissaat ernumassutigineqarpoq
Tillie Martinussenip partiimi isumaa malippaa, Nivi Olsenilu taamaaliunngilaq.
Tusagassiuutinummi tapiissuteqartarnerup allanngortinneqarnissaa Inatsisartut upernaakkut ataatsimiinneranni suliarineqarmat, Tillie Martinussen erseqqilluinnartumik ima oqarpoq:
- Tusagassiuutinut naqitanut tapiissutaasartut Demokraatit tungaannit pingaartilluinnarpagut, aningaasaliissutaasartullu 2014-ip siornatuulli ingerlaannarnissaat kissaatigalutigu, Demokraatit tusagassiuutit pillugit oqaaseqartartuat taamani taama oqarpoq.
AAMMA ATUARUK Nivi Olsen: Allatut tapiisarnerup tusagassiuutit nutarsassavai
Demokraatillu naalakkersuisuutitaata Anda Uldumip Nivi Olsenillu partiip isummiussai uniorlugit iliuuseqarnerat qanoq isumaqarfigineraa Atuagagdliutinit apeqqutigineqarmat ima akivoq:
- Isumaliuutissiissut naammaginngitsupilussuuara tamannalu taakkununnga toqqaannartumik apuuppara, Tillie Martinussen taama oqarpoq.
- Aamma suliami tamatumani isummakka ilungersuutigissallugit qularutiginngilluinnarpara, Demokraatit tusagassiuutit pillugit oqaaaseqartartuat taama oqarpoq.
