Randi Kellylu: Espersen ingasattajaarpoq
Aningaasanut inatsitip amigartooruteqarfiunera nunattalu politikkerii namminiilivinnissamut piumasaqarnerat imminnut assortuuttut, Søren Espersen Jyllands-Postenimi oqallinnermut ilanngussamini allaaserivoq. Kalaallit Nunaat aningaasaqarnikkut imminut isumagisinnaanngitsuusoq ilaatigut aamma allappoq.
Aappaagulumi aningaasanut inatsit namminiilivinnissamut pitsaasumik tunngaviliisuunngitsoq, Demokraatini isumaqataapput.
- Uani Søren Espersen oqariartuutigigamiuk, aningaasaqarnikkut tamaannak namminiilivissinnaanngitsugut. Uagut isumaqarpugut piviusunngorsinnaasoq, kisiat isumaqarpugut aamma aqqutaa suli takisoq, iluarsisassanillu ulikkaartoq. Taamaammat aningaasat equnganerannut assorujussuaq isumaqatiginartorujussuuvoq, Demokraatini siulersuisoq Randi Vestergaard Evaldsen taama oqarpoq.
AAMMA ATUARUK Kalaallit politikeriisa takorluukkersaarutaat qanoq sivisutigisumik aningaasalersussagatsigit?
Nunatta aningaasartuutai namminiilivinnissarlu imminnut assortuunerarlugit oqarnermut Inuit Ataqatigiinniit Kelly Berthelsen isumaqataanngilaq, paarlattuanilli isigaa. isumaginninneq pitsanngorpat namminiilivinnissaq qanilliartussasoq Kelly Berthelsen isumaqarpoq. Tamatumunngalu aningaasaaliinissaq pisariaqartuuvoq.
AAMMA ATUARUK Namminiilivinnissamik kissaateqarneq Danmarkip tapersersornerusariaqarpaa
- Namminiilivissagutta maassakkumiit ilunngersuleertariaqarpugut. Ilaatigut isumaginninnermut aningaasaliissutigut inuiaqatigiit nukittorsartariaqarpagut, sanngiinnerusagut nukittorsartariaqarpagut, siunissami inuiaqatigiit nukittunerulerumagutta, Kelly Berthelsen oqarpoq.
Danskit politikkerii Søren Espersenip aamma isornartorsiorpai. Kalaallit Nunaat namminiilivikkiartortoq Danmarkip aningaasalersuinnassanerlugu, aviisimi Jyllands-Postenimi oqallinnermut ilanngussamini taama aperivoq.