Danskit politiivisa qimaasut ingerlaannarnissaat akuerigaat
Danmarkimi politiit, nunatsinni nalunaaqutarput malillugu, unnuaq aalajangerput qimaasut honnorujut arlallit Danmarkip kujasinnerusortaani Rødbymi Padborgimilu timersortarfissuarni uninngatinneqartut killeqanngitsumik ingerlaqqissinnaasut.
Danmarkimi nutaarsiassaqartitsiviit arlallit taama ilisimatitsipput.
Qimaasorpassuit ulluni kingullerni qimuttuitsorlutik Tysklandimit tikipput Danmarkimilu inussamik ipaasaat tunngavigalugit nalunaarsorneqarnissartik akueriumanagu. Ilarpassui Sverigemut ingerlaqqikkusupput, Sverigemut qimaasutut isernissamik qinnuteqarnissartik kissaatigalugu.
Qimaasut killeqanngitsumik ingerlaqqissinnaanerannik akuersissuteqarneq danskit naalakkersuisuinit tunniunneqarsimasutut isikkoqanngilaq. Politiillu kattuffianni siulittaasup Claus Oxfeldtip danskit politikerii isornartorsiorpai qanoq-iliuuseqannginnerarlugit.
Naalakkersuisut sakkortuumik isornartorsiorpai
- Ingerlasussanik piareersaaneq aqutsinerlu annertooq matumani pineqarpoq, taamatullu ingerlasoqaannassappat qanoq iliussaagut? Taava inuit piumanngitsut nakuuserfigisariaqalissavagut? Pissutsit ajorluinnarput, Oxfeldt nutaarsiassaqartitsivimmut Ritzaumut taama oqarpoq.
- Matumani immikkut illuinnartumik pisoqarnerani qanoq iliortoqarnissaanik politikerinit oqaluttuunneqanngilagut, Claus Oxfeldt oqarpoq.
Ministeriunerup Lars Løkke Rasmussenip partiit siuttui tamaasa pisut pillugit Danmarkimi nalunaaqutaq malillugu nalunaaqutaq qulinut Christiansborgimi ataatsimiinnissamut aggersarpai.
