Danskit partiivisa qineqqusaarutiminni naalagaaffeqatigiinneq ilanngutinngilaat

Partiit maaniittut Folketingimi kikkunnik suleqateqarnissartik oqaatigereerusunngikkaat, danskit partiivisa qineqqusaarutiminni naalagaaffeqatigiinneq ataatsimilluunniit eqqaanngilaat. Partiillu nassuerutigaat tamanna kukkunerusoq.
juunip 07-at 2015 14:45

Danskit partiivisa naalagaaffeqatigiinnermi suna anguniagarineraat paasiniarniaraanni sivisuumik ujarlertariaqassaaq.

Tassami partii ataaseq kisimi pinnani arlaannaasaluunniit anguniakkaminni naalagaaffeqatigiinneq eqqaasimanngilaat.

Venstreni nunarput pillugu oqaaseqartartup Claus Hjort Frederiksenip tamanna ajuusaarutigaa:

- Eqqaariarakku nassuerutigissavara tamanna kukkunerusoq. Immikkut eqqaasimannginnatsigu peqquteqarsimavoq naalagaaffeqatigiinneq taamaattussaannartut isigigatsigu. Takusinnaavarali amigaataasoq tamannalu aaqqiivigisariaqarparput.

SF-imiit aamma taamatungajak akipput:

- Sooruna SF-ip qineqqusaarutaani naalagaaffeqatigiinneq eqqaaneqarsimanngitsoq? Aperaavut.

- Apeqqut pitsassuaq. Aperineqarsimanngitsuuguma immaqa eqiingaffiginngitsoorsimassagaluarpara, maannali iliuuseqarfigissavara.

 

Kukkusoqarpoq

Radikalini nunarput pillugu oqaaseqartartoq Helle Mølvig Løvgreen ima akivoq:

- Piaaraluta ilanngutinngitsuunngilarput. Uangaanngilaq nittartakkatsinnik aqutsisoq.

Partiili naalagaaffeqatigiinneq Kalaallit Nunaallu pillugu ersarissumik politikkeqarpoq - tamanut maanna saqqummiunneqanngiinnarput.

Socialdemokratini nunarput pillugu oqaaseqartartoq Flemming Møller Mortensen ima oqarpoq:

- Isumaqarpunga naalagaaffeqatigiinnermut tunngasut allami eqqartortaratsigit partiip anguniaagaatinngikkigut.

Taamaallaat Dansk Folkepartiit patiip anguniagaani immikkoortortaqarput ilaatigut naalagaaffeqatigiinneq, arfanniarneq aammalu silap allanngoriartornera.

Partiilli tamarmik erseqqissarpaat, naalagaffeqatigiinneq Issittorlu ulluinnarni politikkiminni pingaartikkitsik.

 

Paquminartikkaat

Naak Venstret tikkuaraluaraat allanneqarsimannginnerannut peqqutaasoq Kalaallit Nunaannut tunngasut eqqartussallugit paqumigineqartarsinnaasut.

- Isumaqarpunga partiip anguniagaanut kalaallinut savalimmiormiunullu tunngasut inississallugit naleqqutinngitsut. Naalagaaffeqatigiinneq pillugu ministeriunerup nalunaarutai summersorfigisinnaasarpavut, Mortensen naggasiivoq.